Марказий банкнинг Банк назорати қўмитаси томонидан 2025 йилнинг февраль ойида саккиз марта йиғилиш ўтказилиб, 43 та масала кўриб чиқилди.

Рўйхатга олиш ва рухсат бериш йўналишида 31 та масала, шу жумладан, кредит ташкилотлари уставига киритилган ўзгартиришларни рўйхатдан ўтказиш бўйича саккизта, янги очилаётган микромолия ташкилотларини ҳисоб рўйхатдан ўтказиш бўйича учта масала кўрилган.

Шунингдек, кредит ташкилотларининг устав фондидаги улушига эгалик қилиш учун рухсат бериш (5 та) ва ваколатхона очишга рухсат бериш (1 та), тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш (13 та) билан боғлиқ масалалар муҳокама қилинди.

Маълум бўлишича, “Ishonch Plyus hamkor mikromoliya tashkiloti” МЧЖнинг таъсисчилари томонидан ташкилотни тугатиш тўғрисида қарор қабул қилинганлиги муносабати билан ушбу микромолия ташкилоти давлат реестридан чиқарилган.

Бундан ташқари, кредит ташкилотларининг молиявий ҳолатига оид 12 та масала – Марказий банкнинг кўрсатмалари ва пруденциал меъёрлари талабларининг бажарилиши, тижорат банкларида ўтказилган ўрганиш натижалари ҳам кўриб чиқилган.

Марказий банк томонидан ўтказилган ўрганишлар натижасида аниқланган камчиликлар, жумладан, Марказий банк томонидан ўрнатилган иқтисодий меъёрларга ва қонунчилик талабларига риоя қилинмаганлиги учун учта банк чора ва санкциялар қўлланилиши тўғрисида огоҳлантирилди.

Шунингдек, амалдаги қонунчилик, Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар учун бешта банкка нисбатан жарима санкцияси қўлланилган.