Марказий банк 2025 йилнинг илк чораги якуни бўйича тижорат банкларининг кредит портфели ва муаммоли кредитлар улуши бўйича маълумотни тақдим қилди. Унга кўра, 1 апрель ҳолатига банкларнинг кредит портфели йил бошига нисбатан 18,7 трлн сўмга ортиб, жами 551,8 трлн сўмни ташкил қилган.

Портфелдаги муаммоли кредитлар (NPL) 2,3 трлн сўмга ортган ва жами 23,5 трлн сўмга тенг бўлган. Чорак давомида жами кредитлардаги NPL улуши 4,3 фоизгача ошган.

^{Манба: cbu.uz}

Давлат банклари

Биринчи чоракда давлат банкларининг кредит портфели 12,9 трлн сўмга ортган ва 379,6 трлн сўмга тенг бўлган. Давлат банкларининг муаммоли кредитлари эса 1,8 трлн сўмга кўпайиб, 16,1 трлн сўмдан ошган.

Жами кредит портфелининг ўсиши Агробанк (+5,2 трлн сўм) ва Ўзсаноатқурилишбанк (+3,4 трлн сўм)да нисбатан жадалроқ рўй берган.

Давлат банклари орасида фақатгина Халқ банки (-433,6 млрд сўм) кредит портфелида камайиш кузатилган.

Мазкур банклар орасида энг кўп NPL ортиши Ўзсаноатқурилишбанк (+960 млрд сўм) ҳисобига тўғри келган. Шунингдек, 3 та банкда NPL миқдори камайган.

Бошқа банклар

Чорак давомида давлат назоратида бўлмаган банкларнинг кредит портфели 5,8 трлн сўмга ортган ва 172,2 трлн сўмга етган. Портфелдаги муаммоли кредитлар эса 522 млрд сўмга ўсган ва 7,36 трлн сўмга тенг бўлган. Жами кредитлардаги NPL улуши 4,1 фоиздан 4,3 фоизгача кўтарилган.

Январь-март ойларида энг кўп кредит портфели ортиши TBC Bank'да кузатилган бўлиб, банк портфели 1,8 трлн сўмга ошган ва жами 9,2 трлн сўмга етган.

Ипотека банк (-716,5 млрд сўм), Тенге банк (-129,2 млрд сўм), Гарант банк (-54,9 млрд сўм) ва яна бешта банкнинг кредит портфелида камайиш кузатилган.

Нодавлат банкларнинг муаммоли кредитлар ортишида TBC Bank (+144 млрд сўм), Капиталбанк (+177 млрд сўм) ва Ориент Финанс банк (+121 млрд сўм) асосий ролни ўйнаган.

Шу билан бирга, тўққизта банкда NPL улуши камайган.

Эслатиб ўтамиз, февраль ойи давомида Ўзбекистон банкларининг кредит портфели 6 трлн сўмдан зиёдроққа кўпайиб, жами 540 трлн сўмни ташкил қилганди. Давлат банкларининг кредит портфели 3,8 трлн сўмга, бошқа банкларники эса 2,3 трлн сўмга ошганди. Портфелдаги муаммоли кредитлар (NPL) улуши 580 млрд сўмга кўпайган ва жами 24,3 трлн сўмга етганди.