1875 йилда Тошкентда Давлат банкининг филиали очилди. Узоқ вақт давомида бу банк Туркистонда ягона банк ҳисобланган (ХIХ асрнинг 90 йиллари). Бу филиал мустамлака маъмуриятининг бюджет маблағларини назорат қилган ва савдони ривожлантириш учун кредитлар ажратиш билан шуғулланган.

Фото: Bankers.uz

Филиалнинг биринчи раҳбари Николай Михайлович Бахтияров эди. Қизиқ томони шундаки, Николай Михайловичнинг мутахассислиги врач эди. У Тошкент филиалини 1881 йилгача бошқарган.

Музей экспозицияси эса 2018 йил 20 октябрь куни очилган. Бу ерда телефон, ёзув машинкалари, давлат кредит карталари сингари бир қатор тарихий экспонатлар мавжуд.

Фото: Bankers.uz

Тошкент филиалига биринчи йирик омонатни ишониб топширган шахс Қўқон хони Худоёрхон бўлиб, у Оренбургга жўнаб кетишдан олдин банкга 140 минг рублга тенг Қўқон кумуш тангаларнини ишониб топширган.

Фото: Bankers.uz

Музейга ташриф буюриб ХIХ асрнинг асл меъморий элементларини: деворий печ ўтхонаси эшиклари, Франц Сан-Галли чўян қуйиш ва механика заводининг катта эшиклари, пул ва бошқа молларни кўтариш механизмларини, ўша пайтнинг кичик лифтини кўриш мумкин. 

SQBнинг премиум мижозларига хизмат кўрсатадиган қисми ҳам ажойиб атмосферага эга. Деворларда Тошкент давлат банкининг биноси, Қўқондаги Москва ҳисоб палатаси, Самарқанддаги ғазна, Николаев, Романовский кўчалари, Кауфман катта кўчаси ва бошқа асл нусхадаги тарихий фотосуратлар илинган. 

Фото: Bankers.uz

Давлат банкининг Тошкент филиали Туркистонда 40 йилдан ортиқ фаолият кўрсатган. Ҳозирда Тошкент филиали тарихий биносида Ўзсаноатқурилишбанкнинг филиали фаолият кўрсатмоқда.

Аввалроқ, банк очилиши ва унинг фаоилияти тўғрисида батафсил ёзган эдик.