Марказий банк тижорат банкларининг кредит портфели ва муаммоли кредитлар улуши бўйича маълумот тақдим қилди. Унга кўра, 1 февраль ҳолатида банкларнинг жами кредит портфели 868 млрд сўмга ошиб, қарийб 534 трлн сўмга етган.

Портфелдаги муаммоли кредитлар (NPL) улуши 2,6 трлн сўмга ортган ва жами 23,8 трлн сўмни ташкил қилган. Жами кредитлардаги NPL улуши 4,5 фоизга етган.

Давлат банклари

Январь ойида давлат улуши мавжуд бўлган банкларнинг кредит портфели 129 млрд сўмга ортган, NPL эса 2,5 трлн сўмга ортган.

Ўзмиллийбанк (-514,8 млрд сўм), Ўзсаноатқурилишбанк (-144,4 млрд сўм), Халқ банки (-860,6 млрд сўм) ва Туронбанк (-99,4 млрд сўм) кредит портфелида камайиш кузатилган.

Агробанк ва Халқ банкидан ташқари барча давлат банклари порфелида NPL улуши ортган. Хусусан, NPL улуши энг кўп Ўзсаноатқурилишбанк (+1,1 трлн) ва Ўзмиллийбанк (503 млрд сўм) ҳисобига тўғри келган.

Давлат банклари кредит портфелида муаммоли кредитлар улуши 4,6 фоизгача ўсган.

Бошқа банклар

Давлат назоратида бўлмаган банкларнинг кредит портфели 738 млрд сўмга ортган, NPL эса 107 млрлд сўмга ошган.

Ой давомида 12 та нодавлат банкнинг кредит портфели камайган.

Мазкур банклар орасида NPL энг кўп ортиши Ориент Финанс банкда (+82 млрд сўм) кузатилган.

Хусусий банклар кредит портфелида NPL улуши 4,2 фоизни ташкил қилган.

Эслатиб ўтамиз, 2024 йил давомида Ўзбекистон банклардаги жами муаммоли кредитлар 4 трлн 564 млрд сўмга ёки 27,5 фоизга кўпайиб, уларнинг қолдиғи қарийб 21,2 трлн сўмга етганди.