Uzum Bank Кузатув кенгаши Светлана Хени банк Бошқаруви раиси этиб тайинлаш ҳақида қарор қабул қилди. Uzum Bank'га 2023 йил июнидан раҳбарлик қилиб келаётган хорижлик мутахассис Александр Филиппович операцион директор сифатида ишлашда давом этади. Uzum Bank вакилининг Bankers.uz'га маълум қилишича, А.Филиппович Uzum Fintech бирлаштирилган йўналишининг маҳсулотлари ва сервисларини ривожлантиришда кўмаклашади.

Банкнинг янги бошқарув раиси Светлана Хе Uzum Fintech жамоаси билан биргаликда компаниянинг узоқ муддатли стратегиясини кучайтириш ҳамда Ўзбекистон мижозлари ва тадбиркорлари учун илғор финтех-сервисларни ишлаб чиқишга эътибор қаратади.

"Светлананинг тажрибаси молиявий маҳсулотларни кенгайтиришга ёрдам беради, шунда республиканинг миллионлаб аҳолиси пул маблағларини онлайн тарзда тез, осон ва ишончли бошқара олади", - дейилган банк хабарида.

Александр Филиппович Uzum Fintech'да кросс-функционал бизнес-жараёнларни сифат жиҳатидан янги босқичга олиб чиқиш ҳамда маҳаллий ва халқаро ҳамкорлар билан алоқаларни ривожлантиришга ҳисса қўшади.   

Маълумот учун, Светлана Хе 1980 йил туғилган. 2001 йил Тошкент молия институтини бакалавр, 2004 йил магистр босқичларини тамомлаган. Меҳнат фаолиятини Ташқи иқтисодий фаолият Миллий банкида бошлаган. 2004-2012 йилларда Капиталбанк тизимида турли лавозимларда, 2012-2022 йилларда Octobank бош бухгалтери, 2022 йил июнь ойидан банк бошқаруви раиси маслаҳатчиси лавозимида ишлаган.

2023 йилнинг май ойидан 2025 йилнинг январь ойигача Yangi Bank АЖга раислик қилган.