2024 йилда Ўзбекистон тижорат банкларининг кредит портфели 61,7 трлн сўмга ёки 13 фоизга ортди. Натижада, йил якунига келиб, банкларнинг кредит портфели 533,1 трлн сўмни ташкил қилди. Жами банк тизими кредит қўйилмаларининг 80 фоизи 10 та банк ҳисобига тўғри келган.

Давлат банклари

Давлат улуши мавжуд банкларнинг кредит портфели 366,7 трлн сўмга етган. Бу жами банк тизими кредит портфелининг 68,8 фоизи ҳисобланади. 2024 йил давомида мазкур банкларнинг кредит портфели 33,5 трлн сўмга ёки 10 фоизга ўсди.

Кредит портфелнинг ўсиш суръати бўйича Алоқабанк йиллик 25,8 фоизлик ўсиш билан етакчи бўлди.

Миқдор жиҳатдан Ўзмиллийбанк кредит портфелини 8,6 трлн сўмга кўпайтирган ҳолда бутун банк тизимида лидерлик қилган. Банкнинг кредит портфели 108 трлн сўмдан ошган.

Давлат банклари орасида фақатгина Асакабанк портфелида камайиш кузатилган. Йил давомида банкнинг портфели 496 млрд сўмга камайган. Шунга қарамасдан, Асакабанк мамлакатнинг энг катта кредит портфелга эга ТОП-5 банкларидан бири бўлиб турибди.

Бошқа банклар

Давлат назоратида бўлмаган банкларнинг кредит портфели 20,4 фоизга ёки 28,2 трлн сўмга ортиб, 166,4 трлн сўмни ташкил қилди.

Ушбу банклар орасида кредит портфелнинг миқдор жиҳатдан кўпайиши бўйича Капиталбанк етакчилик қилди. Банкнинг кредит портфели салкам 5 трлн сўмга ортган. Бу 2023 йилга нисбатан 18,9 фоизга кўпроқдир.

Шунингдек, ANORBANK (+116,4%) ва TBC Bank'ларнинг (+100,3) крдеит портфели ҳам сезиларли ўсган. Иккала банкнинг кредит портфели мос равишда 6,9 трлн сўмни ва 7,5 трлн сўмни ташқил қилган.

2024 йилда Ориент Финанс банкнинг кредит порфели 4,1 трлн сўмдан кўпроққа ошганини қайд этиш лозим. Банкда портфелнинг йиллик ўсиши 48,7% бўлган.

AVO Bank ва Hayot Bank'ларнинг портфеллари бир неча ўн баробарга ортган. AVO Bankнинг кредит қўйилмалари ҳажми 2023 йилда қарийб 7 млрд сўмни ташкил қилган бўлса, 2024 йилда бу кўрсаткич 283 млрд сўмгача етган.

Октобанк (-23,8%) ва Гарант банкнинг (-13,5%) кредит порфелида пасайиш кузатилган. Бундан ташқари, Эрон Содерот банк портфели ҳам ҳам 2,8 фоизлик камайиш қайд этган.

ТОП-10

Жами банк тизими кредит портфелининг 80 фоизи кредит портфели энг катта ТОП-10 банк ҳисобига тўғри келган. Бу банклар қуйидагилар ҳисобланади:

1. Ўзмиллийбанк — 108 014 млрд сўм;
2. Ўзсаноатқурилишбанк — 65 498 млрд сўм;
3. Агробанк — 59 436 млрд сўм;
4. Асака банк — 38 717 млрд сўм;
5. Ипотека-банк — 35 094 млрд сўм;
6. Капиталбанк — 31 584 млрд сўм;
7. Халқ банки — 29 620 млрд сўм;
8. Бизнесни ривожлантириш банки — 22 527 млрд сўм;
9. Ҳамкорбанк —19 178 млрд сўм;
10. Микрокредитбанк —17 416 млрд сўм.

Бошқа банкларнинг кредит портфели динамикаси билан қуйидаги инфографикада танишиш мумкин:

^{Инфографика: Bankers.uz}

Эслатиб ўтамиз, аввалроқ 2024 йил ноябрь ойида банкларнинг кредит портфели 4,86 трлн сўмга кўпайиб, унинг жами қолдиғи 525,9 трлн сўмга етгани ҳақида хабар берилганди.