2024 йилда Ўзбекистон тижорат банкларининг жами капитали 17,3 трлн сўмга ёки 18 фоизга ортган ҳолда умумий 114,8 трлн сўмга етди. Банкларнинг устав капитали ҳажми эса 18 фоизлик ўсиш қайд этиб, 83,3 трлн сўмни ташқил қилди.

Давлат банклари

Давлат назоратида бўлган банкларнинг капитали йил давомида 7 трлн сўмга ортган ва 70,2 трлн сўмга тенг бўлган. Ушбу банкларнинг капиталлари йиғиндиси умумий банк тизими жами капиталининг қарийб 61 фоизини ташкил қилади.

Мазкур банклар орасида фақатгина Микрокредитбанк жами капиталида (-383 млрд сўм) камайиш кузатилган. Бироқ банкнинг устав капитали йил давомида 1,32 трлн сўмга ортган. Маълумот учун, банк 2024 йилни 1,7 трлн сўм зарар билан якунлаган (мазкур зарар банк капитали камайишида рол ўйнаган).

Жами капитал ўсиши бўйича энг яхши кўрсаткич Халқ банкида кузатилган. Банкнинг капитали 2,1 трлн сўмга ёки 36 фоизга ошиб, 8 трлн сўмга етган. Шунингдек, Ўзсаноатқурилишбанк (+1,3 трлн сўм), Бизнесни ривожлантириш банки (+1,1 трлн сўм), Асакабанк (+1,35 трлн сўм) ва Ўзмиллийбанкларнинг (+1 трлн сўм) жами капитали ҳам 1 трлн сўмдан кўпроққа ошган.

Бизнесни ривожлантириш банкининг устав капитали 3,34 трлн сўмга ортганини ҳам таъкидлаб ўтиш лозим.

Бошқа банклар

Давлат назоратида бўлмаган банкларнинг жами капитали 44,6 трлн сўмга етган. 2024 йилда ўсиш 10,2 трлн сўмга етган.

Бу сегментда молиявий зарар ҳисобига Ипотека банк (-242 млрд сўм) ва Yangi Bank'ларнинг (-32 трлн сўм) капиталида камайиш кузатилган.

Капитал ортиши бўйича эса Hamkorbank (+1,4 трлн сўм) ҳамда TBC Bank (+1,3 трлн сўм) етакчилик қилган. Шунингдек, TBC Bank (+830 млрд сўм) устав капитални ошириш бўйича ҳам хусусий банклар орасида биринчи бўлган. AVO Bank'нинг устав капитали 540 млрд сўмга ортгани ҳам эътиборга лойиқ.

2024 йилда 10 дан ортиқ хусусий банклар устав капиталини 500 млрд сўмга етказди ёки ундан оширди.

^{Инфографика: Bankers.uz}

Эслатиб ўтамиз, 2023 йилда Ўзбекистон банкларининг жами капитали 97 трлн 79 млрд сўмни, устав капитали эса 68 трлн 643 млрд сўмни ташкил қилганди.