2024 йилнинг январ-декабрь ойларида аҳоли томонидан банкларга 16,1 млрд доллар миқдорида (+31 фоиз) чет эл валютаси сотилиб, банклардан 9,4 млрд доллар (+3 фоиз) харид қилинди. Бу ҳақда Ўзбекистон Марказий банкининг жисмоний шахсларнинг валюта операциялари бўйича қисқача шарҳида маълумот келтирилган.

Жисмоний шахслар томонидан банкларга сотилган чет эл валютаси ҳажми сотиб олинган чет эл валютаси ҳажмидан 6,7 млрд долларга кўп бўлди.

2024 йилда банклар ҳамда жисмоний шахслар ўртасидаги чет эл валютаси олди-сотди операциялари айланмасининг умумий ҳажми 2023 йилга нисбатан 19 фоизга (+4 млрд долл) кўпайиб, 25,5 млрд долларни ташкил этди.

"Шунингдек, валюта айирбошлаш шохобчалари умумий сони йил давомида 20 фоизга ошиб, 6,2 мингтага етказилди", дейилади МБ шарҳида.

Бунда, 24/7 режимида ишлайдиган автоматлаштирилган валюта айирбошлаш банкоматлари сони 3,4 мингдан ортиқ бўлиб, улар аҳоли гавжум жойлар, туристик ҳудудлар, аэропортлар, вокзаллар, меҳмонхоналар ва савдо мажмуаларида жойлаштирилгани қайд этилди.

Эслатиб ўтамиз, аввалроқ ўтган йил мобайнида Ўзбекистонга пул ўтказмалари ҳажми бўйича хабар берган эдик.