20 декабрь куни Шавкат Мирзиёев мамлакатнинг етакчи тадбиркорлари билан учрашди. Унда TBC Group вакили Оливер Хьюз шахсга доир маълумотлар ҳамда банк маълумотларини Cloud’да сақлашга рухсат бериш бўйича қонунчиликка ўзгартириш киритиш таклифини илгари сурди.

"Мен баъзи масалаларни таъкидлашни хоҳлардим. Аввало, мен бу ерда саноат ва банк секторининг номидан сўзлаяпман, деб ўйлайман. "Облако" ёки "Cloud" деб номланган масала мавжуд. Бугунги кунда шахсий маълумотлар ва банк маълумотларини сақлаш бўйича банкларга жуда қатъий талаблар қўйилган. Биз уларни ўз ҳисоблаш марказларимизда сақлашимиз лозим, бу эса узоқ вақт талаб этади ва кенгайишни қийинлаштиради. Бу технологик компаниялар ривожланишига тўсқинлик қилиши мумкин.", - деди Оливер Хьюз.

Ҳозирда бу масала ҳукумат, Марказий банк билан биргаликда муҳокама қилинаётгани айтилди. Оливер Хьюзнинг бу борада қонунчиликка ўзгартиришлар киритишни таклиф қилди, шунда банклар шахсга доир ва банк маълумотларини Ўзбекистонда ёки ҳатто чет элда "булут"ларда сақлашга рухсат олиши мумкин бўлади.

Бу муҳим масала нафақат технологик саноат ва банк секторини ривожлантириш, балки сунъий интеллектни ривожлантириш учун ҳам муҳимдир, чунки сунъий интеллект жуда кўп ҳисоблаш қувватини талаб қилади, бундай қувват ҳозирги кунда Ўзбекистонда мавжуд эмас. Биз бу борада иш бошладик, сунъий интеллектга асосланган ботларни ишлаб чиқяпмиз ва шу муаммолар билан дуч келмоқдамиз, деди TBC Group вакили.

Президент бу долзарб масала эканини таъкидлади. Сунъий интеллект келажак экани ва бунга жиддий эътибор қаратиш лозимлиги айтилди.

Марказий банк, адлия вазирлиги, ва бошқа расмийлар билан бирга келажакка оид таклифларни кўриб чиқишимиз керак. Биз турли томонларини кўриб чиқиб, ягона тўғри қарор қабул қилишимиз шарт. Бу фуқаронинг шахсий маълумотларига тегишли муаммо, бу жуда жиддий масала. Бу ерда бизнинг хато қилишга ҳаққимиз йўқ, деди президент.

Аввалроқ, Президентнинг тадбиркорлар билан бўлган учрашувда кейинги йил банклар томонидан жами 300 трлн сўмдан кўпроқ кредитлар ажратилиши қайд этилганди.