Ўзбекистондаги терминаллар ва дўконларда Газпромбанкка қарашли UnionPay карталари ишламай қолди. Бу ҳақда ТАСС хабар берди.

Агентлик мухбирининг ёзишича, 22 ноябрь кунидан бошлаб банкоматларда Газпромбанкнинг UnionPay картасидан нақд пул ечиб олиш, шунингдек, дўкон терминаллари орқали тўлаш имконияти бўлган Ўзбекистон банклари бундай карталарга хизмат кўрсатишни тўхтатган. Ўзбекистон Марказий банки матбуот хизмати агентликка ушбу карталарга хизмат кўрсатишнинг тўхтатилиши Ўзбекистон томонининг ташаббуси билан рўй бермаганини маълум қилган.

“Spot.uz” нашрининг Марказий банк изоҳига таяниб хабар беришича, Газпромбанкнинг UnionPay карталарини блоклаш регулятор ёки маҳаллий банклар томонидан эмас, балки бевосита тўлов тизимининг ўзи томонидан амалга оширилган.

21 ноябрь куни АҚШ молия вазирлиги Россияга қарши санкцияларнинг янги пакетини эълон қилди. Ушбу рўйхатда ўнлаб жисмоний ва юридик шахслар, жумладан, 2022 йилдан бери газ бўйича рублдаги ҳисоб-китоблар олиб бориладиган, шу пайтга қадар санкция қўлланмай келаётган Газпромбанк ҳам бор эди.

22 ноябрь куни Газпромбанк мижозларни Россиядан бошқа мамлакатларда UnionPay карталари ишлаши билан боғлиқ қийинчиликлар ҳақида огоҳлантирди ва карта эгаларига пулларини нақдлаштириб қўйишни тавсия қилди.

23 ноябрдан Газпромбанк Туркия, БАА, Венгрия, Таиланд, Ҳиндистон, Қозоғистон, Қатар, Ветнам, Жанубий Корея, Тунис, Миср, Аргентина, Жанубий Африка, Ўзбекистон, Греция, Хитой, Мўғулистон ва Марокашда UnionPay тўлов тизимининг банк карталарига хизмат кўрсатишни тўхтатди.

Банк мижозларни унинг банк карталари, шу жумладан хорижий тўлов тизимлари Россия бўйлаб ишлашда давом этишига ишонтирмоқда.