Ипотека банк I чорак якунлари бўйича соф фойдаси кескин камайганига изоҳ берди

^{Фото: Ипотека банк}

"Ипотека-банк" АТИБ 2024 йил 1-чорак якунлари бўйича ўз ҳисоботини тақдим этди. Ҳисоботда, хусусан банкнинг 2024 йилнинг биринчи чорагида жами соф фойдаси нима учун кескин камайганлига ҳам изоҳ берилган. Аввалроқ, Ипотека банкнинг 2024 йилнинг дастлабки уч ойи якуни бўйича соф фойдаси ўтган йилнинг мос даврига нисбатан 99 фоизга (376 млрд сўмга) камайиб кетганлигини қайд этган эдик.

Банк соф фойдасининг камайишини олинган юқори операцион даромадларнинг Марказий банк талабларига асосан корпоратив кредитлар учун захира шакллантирилишига йўналтирилганлиги билан изоҳлаган.

"Ипотека-банк OTP Group аъзосига айланганидан буён гуруҳнинг кўмаги билан халқаро ва миллий стандартларга мувофиқ етарлича захираларни яратган ҳолда портфелдаги кредитларни муносиб баҳолаш устида фаол иш олиб бормоқда ва кредит портфелининг яхшиланиши бевосита банк соф фойдасига ижобий таъсир қилади.", - дейилади банк хабарида.

Шунингдек. Ипотека-банк мижозлар учун хизматлар сифатини яхшилаш мақсадида технологияларни модернизация қилиш ва хизматлар кўламини кенгайтириш учун катта сармоя киритаётганини қайд этган.

Эслатиб ўтамиз, аввалроқ Ўзбекистон банкларининг 1-чоракдаги молиявий натижалари маълум бўлгани ҳақида ёзгандик.