Банкларнинг кредит портфели 1-чорак давомида 18 трлн сўмга кўпайди

Маълумотларга кўра, 2023 йилнинг I чораги якунлари бўйича банкларнинг жами кредит портфели ҳажми 408 трлн 167,2 млрд сўмни ташкил қилган. Кредит қўйилмалари йил бошидан қарийб 18,12 трлн сўмга ёки 4,6 фоизга ўсган.

Кредит портфелининг 63,5 фоизи 5 та йирик давлат банки — Ўзмиллийбанк (21,8%), Ўзсаноатқурилишбанк (12,9%), Агробанк (11,7%), Асакабанк (9,1%) ва Ипотека-банк (8,0%) ҳиссасига тўғри келади.

Кредит портфелининг нисбатан жадалроқ миқдорий ўсиши Ўзсаноатқурилишбанк (+4,74 трлн сўм), Агробанк (+4,02 трлн сўм) ва Капиталбанк (+3,02 трлн сўм)да, йил бошидаги кўрсаткичга нисбатан фоизда ўсиши эса TBC Bank (+24,4%), Капиталбанк (19,6%) ва Инфинбанк (17,7%)да кузатилган. 1 апрель ҳолатига Ўзмиллийбанкнинг кредит портфели 614,3 млрд сўмга (ёки 0,7%га) қисқарган.

Март ойида 5 млн долларга сотилган Ўзагроэкспортбанк I чоракда 6,2 млрд сўмлик ёки жами кредит портфелининг 91,6 фоизлик кредитларини ҳисобдан чиқариш орқали 0,5 млрд сўмлик кредитлар қолдиғига эга бўлган. 1 март ҳолатига кўра, молия муассасаси 0,6 млрд сўмлик кредит портфелига, хусусан 0,4 фоизлик муаммоли кредитлар қолдиғига эгалик қилганди.

Агробанк (35,32 трлн сўм), Ўзмиллийбанк (27,27 трлн сўм) ва Ипотека-банк (21,51 трлн сўм) лар миллий валютадаги кредит портфели бўйича етакчилик қилмоқда. Шунингдек, Ўзмиллийбанк (61,52 трлн сўм), Ўзсаноатқурилишбанк (34,79 трлн сўм), Асакабанк (25,63 трлн сўм)лар кредит портфели таркибида хорижий валюта берилган кредитлар устунлик қилади.

Батафсил жадвал билан қуйида танишишингиз мумкин: