Бухоро ва Хоразмда имтиёзли кредит маблағларини талон-торож қилиш ҳолатлари аниқланди

Бухоро вилоятининг Когон шаҳри ҳамда Хоразм вилоятининг Шовот туманида умумий қиймати 1,11 млрд. сўмлик кредит маблағларини талон-тарож қилиш ҳолатлари аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш Департаменти хабар бермоқда. 

Департаментнинг Когон шаҳар бўлими томонидан ўтказилган терговга қадар текширувда "Q.M" МЧЖ раҳбари юк автомашинаси ва юк кўтаргич сотиб олиш учун Қишлоқ қурилиш банк Когон БХО томонидан ажратилган 650 млн. сўм имтиёзли кредит маблағини сохта ҳужжатларни расмийлаштириш орқали отаси А.Р. раҳбарлигидаги “A.T.” МЧЖга ўтказган ҳолда, кредит маблағини бошқа мақсадларда сарфлаб, талон-торож қилганлиги аниқланган.

Шунингдек, Департаментнинг Шовот туман бўлими хабарига кўра, “А.Г.” МЧЖ раҳбари расмий ҳужжатларга соҳта маълумотлар киритиш орқали, ҳудудий тижорат банки филиалидан мебель ишлаб чиқариш учун ажратилган 460 млн. сўм кредит маблағини ўзлаштириш йўли билан талон-торож қилган.

Ушбу ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.