Регулятор иккита банкнинг лицензиясини чақириб олди

Марказий банк «Туркистон» ХАТБ ҳамда "HI-TECH BANK" ХАТБлардан банк фаолиятини амалга ошириш ҳуқуқини берувчи лицензияларини чақириб олди.

Бугун, 7 октябрь куни бўлиб ўтган Марказий банк Бошқарувининг йиғилиши шундай қарорга келган.

Туркистонбанк ва Hi-Tech Bank "Банклар ва банк фаолияти тўғрисида"ги Қонуннинг 54 ва 77-моддаларида белгиланган қоидабузарликлар содир этган деб топилган. Иккала банкда ҳам:

• банк активлари бўйича эҳтимолий йўқотишларга қарши етарлича захиранинг мавжуд эмаслиги;
• регулятив капиталининг эллик фоизидан ортиқ миқдорда зарар кўрганлигини; 
• банк хизматлари истеъмолчиларининг ҳуқуқлари ва қонуний манфаатлари бузилганлиги;
• бухгалтерия ҳисобининг ҳисоботга оид маълумотлар бузилишига олиб келадиган ва банкнинг ҳақиқий молиявий аҳволини акс эттириш имконини бермайдиган қоидабузарликлар билан юритилганлиги;
• банк фаолиятидаги қўпол қоидабузарликларни бартараф этиш тўғрисидаги Марказий банк кўрсатмаларининг белгиланган муддатда бажарилмаганлиги;
• жиддий қоидабузарлик учун Марказий банк томонидан жарима қўлланилганидан кейин ҳудди шундай қоидабузарликни такроран содир этилганлиги сабабли “Ўзбекистон Республикасининг Марказий банки тўғисида”ги Қонуннинг 20-моддасига мувофиқ Марказий банк бошқаруви шундай қарорга келган.

Марказий банк Бошқарувининг 22/1-сонли қарорига асосан Туркистонбанкни тугатиш комиссияси тайинланди ва қонунга асосан банк ишларини бошқариш бўйича, шу жумладан, банк акциядорларининг умумий йиғилиши, кузатув кенгаши ва бошқаруви ваколатлари ушбу комиссияга ўтди.

Hi-Tech Bank'ни тугатиш комиссияси Марказий банк Бошқарувининг 22/2-сонли қарорига асосан тайинланди. Банкнинг барча ваколатлари ушбу комиссияга ўтди.

“Фуқароларнинг банклардаги омонатларини ҳимоялаш кафолатлари тўғрисида”ги Қонунига мувофиқ, иккала банкдаги омонатчиларнинг барча маблағлари, биринчи навбатда, 2 ойдан сўнг тўлиқ қайтарилади.

Эслатиб ўтамиз, жорий йилнинг 1 февраль куни S&P Global Ratings агентлиги Туркистонбанкнинг дефолт сценарийга яқинлашаётгани маълум қилган эди.