Бош вазир ўринбосари Ўзсаноатқурилишбанк фаолиятини ўрганди

Ўзбекистон Республикаси Бош вазирининг ўринбосари — Инвестициялар ва ташқи савдо вазири Жамшид Ходжаев Тошкент шаҳридаги Ўзсаноатқурилишбанк ўқув ва IT-марказларига ташриф буюриб, банкнинг жорий фаолияти ва ривожланиш режалари билан танишди.

Учрашув давомида банк раҳбарияти тақдим этилаётган хизматлар, жалб қилинган кредит линиялари, молиялаштирилган лойиҳалар, хорижий ҳамкорлар, банкни трансформациялаш доирасида амалга оширилаётган чора-тадбирлар, ахборот технологияларини жорий этиш, шунингдек, банк қошида ташкил этилган ўқув ва IT-марказлар тўғрисида тақдимот ўтказди. Хусусан, 2022 йилда Ўзсаноатқурилишбанк томонидан саноат, қишлоқ хўжалиги ва хизмат кўрсатиш соҳаларида 15,6 триллион сўмлик 1680 та лойиҳа молиялаштирилаётгани, шундан 70 фоизи фойдаланишга топширилгани қайд этилди.

^{Фото: Ўзсаноатқурилишбанк}

Учрашув давомида банк қошида ташкил этилган ўқув ва IT-марказларнинг батафсил тақдимоти бўлиб ўтди. Марказда қулай ижодий муҳит, ходимлар учун хавфсиз ва замонавий меҳнат шароитлари яратилган, хусусан, ўқув маркази бизнес-мураббийлар зали, маъруза зали, кенг кутубхонадан иборат бўлиб, IT-марказ дастурчилар, менежерлар, сервер хоналари ва музокаралар хоналарини ўз ичига олади.

Ўқув марказининг асосий мақсади — банк ходимларининг касбий тайёргарлиги даражасини ошириш, ходимларни доимий такомиллаштириш механизмларини жорий этиш ҳамда стратегик ва банк амалиёти мақсадларига эришиш учун зарур бўлган кўникмаларни ўзлаштириш эканлиги таъкидланди.

^{Фото: Ўзсаноатқурилишбанк}

Марказда "Scrum" ва "KANBAN" замонавий усуллари асосида банк лойиҳаларини бошқарадиган "Agile" гуруҳлари мавжуд. Улар банк тизимида жорий этилаётган янги лойиҳалар ва хизматларнинг ишга туширилишини қўллаб-қувватлайдилар ва ўзлари муассасанинг стратегик вазифаларидан келиб чиққан ҳолда дастурий маҳсулотлар яратадилар. Бугунги кунга қадар марказда “Ягона ойна”, “SQB Business”, “Кредит конвейери” ва "Joyda" каби лойиҳалар ишга туширилди. Бу банкдаги молиявий технологияларни ривожлантиришни кейинги босқичга олиб чиқиш учун асос яратади.

^{Фото: Ўзсаноатқурилишбанк}

Учрашув якунида Ўзсаноатқурилишбанк масъул раҳбарларига хизматларни янада ривожлантириш ва сифатини ошириш бўйича тегишли топшириқлар ва тавсиялар берилди.