Асакабанк Тошкент шаҳридаги LED-мониторларда реклама жойлаштириш учун 1 млрд. сўмлик танлов ўтказмоқда

Асакабанк LED-экранларда видеоролик жойлаштириб берувчи хизматларни кўрсатадиган ташкилотлар ўртасида танлов ўтказмоқда.

Унга кўра, ушбу хизматни кўрсатувчи ташкилот Асакабанк рекламалари акс этган видеороликларни Тошкент шаҳридаги 45 та LED-мониторларда ва 15 та LED-экранли бекатларда жойлаштириб бериши лозим. Ушбу хизмат учун 1 млрд. сўм маблағ ажратиш кўзда тутилган. 

Танловда қатнашмоқчи бўлган ташкилотлар учун қуйидаги талаблар қўйилган:

• иштирокчининг реклама бюджети 1 млрд. сўм бўлиши;
• иштирокичи LED-мониторларга эга бўлиши;
• иштирокчининг камида иккита тавсия хатлари бўлиши;
• иштирокчининг солиқ ва бошқа тўловлардан қарздорлиги бўлмаслиги лозим.

Танловга таклифлар юборишнинг охирги муддати 13 июнь соат 17:00 ҳисобланади. Ушбу танлов бўйича батафсил маълумот билан техник топшириқда танишиш мумкин.

Аввалроқ, "Асакабанк" АЖ 8 дона реклама роликлари тайёрлаш учун 900 млн. сўм харажат қилиш учун танлов эълон қилганди.

Эслатиб ўтамиз, бундан олдин Ўзмиллийбанк ва Алоқабанк ҳам юқоридагига ўхшаш хизматлар кўрсатувчи ташкилотлар ўртасида танлов ўтказганди.