Ислом Тараққиёт Банки Гуруҳининг Миср давлати Шарм ал-Шайх шаҳрида бўлиб ўтган 47-йиллик учрашувида Ориент Финанс Банк ва Хусусий секторни ривожлантириш бўйича Ислом корпорацияси (Саудия Арабистони) раҳбарлари ўртасида музокаралар бўлиб ўтди.

2022 йил 1 июнь куни Ориент Финанс Банк раҳбарияти ва Хусусий секторни ривожлантириш бўйича Ислом корпорацияси (ХСРИК) бош директори жаноб Айман Сежини ўртасида учрашув бўлиб ўтди.

Музокаралар давомида ХСРИК томонидан Банкда “Исломий дарча”ни очиш бўйича яратилиб берилаётган техник маслаҳат хизматлари тўғрисида муҳокамалар бўлиб ўтди. Шунингдек, қайта тикланадиган “Яшил” энергетика манбаларига боғлиқ йирик лойиҳаларни татбиқ этиш ва уларнинг муносиб турлари ҳақида фикрлар юритилди.

Маълумот тариқасида, 2017 йилдан бошланган ОФБ ва ХСРИК ўртасидаги ҳамкорлик бугунги кунга қадар муваффақиятли давом этмоқда. Хусусан, ХСРИК томонидан хусусий секторни молиялаштириш йўналишида Ориент Финанс Банк учун 27 млн АҚШ доллари ажратилган.

Учрашув давомида, Ориент Финанс Банк ва ХСРИК ўртасида 20 млн АҚШ доллари миқдоридаги янги келишув бўйича дастлабки муҳокамалар ўтказилган бўлиб, ушбу маблағ кичик ва ўрта бизнесни ривожлантиришга йуналтирилиши кутилмокда.

ХСРИК бош директори Ориент Финанс Банк билан ҳамкорлик даражасини юқори баҳолади ва ўзаро манфаатли ҳамкорликка ишонч билдирди.