Туронбанк томонидан оммавий ахборот воситалари ва ижтимоий тармоқ фаоллари учун матбуот анжумани ташкил қилинди. Унда, Туронбанкнинг 2020 йилги фаолияти таҳлил қилиниб, бу йилги режалар билан ўртоқлашилди. Хусусан, жорий йилда чакана хизматлар борасида кутилаётган янги хизмат турлари борасида ҳам сўз борди.

Банк мутасаддиларининг маълум қилишича, Туронбанк томонидан жорий йилда "Pin on glass" технологияси ишга туширилади. "Pin on glass" ─ "One Touch" хизматининг такомиллаштирилган шакли бўлиб, у орқали чекланмаган миқдорда тўловларни контактсиз ва ҳеч қандай терминал ускуналарасиз қабул қилиш мумкин. Қолаверса, энди нафақат HUMO, балки Visa ва Mastercard пластик карталари ҳам шу тизимга уланиши режалаштирилган.

Айтилишича, 2021 йил бошига банкнинг жами капитали 1 трлн 210,2 млрд сўмга етган ва 2019 йилга нисбатан ўсиш 119,6 млрд сўмни ёки 9,9 фоизни ташкил қилган. Шунингдек, актив операциялар борасидаги фаоллик ҳам рақамларда ўз аксини топган. Яъни, 8,7 трлн сўмгача етган. Жумладан, банк кредит портфели ҳам барқарор ўсиш динамикасини сақлаб қолиб, 2020 йил якунида 6,6 трлн сўмни ташкил қилган. 2020 йил якуни бўйича жалб қилинган депозитлар миқдори 2019 йилга нисбатан 463,6 млрд сўмга (ёки 21,9 фоизга) кўпайиб, 2,1 трлн сўмгача етган.

Банк мутахассислари 2021 йилда янги чакана кредит ва омонат турлари ишлаб чиқилиши, мобил илова янгиланиши, трансформация жараёнларининг бориши каби қатор муҳим йўналишлар бўйича ҳам журналистларга маълумот беришди.

Шу билан бирга, анжуман давомида аҳоли учун тақдим этилаётган "Имконият плюс", "Янги орзу" ,"Омадли бонус" сингари миллий валютадаги фойдали омонатлар бир қаторда, яқин кунларда аҳоли учун янада жозибадор янги омонат тури ;ҳам жорий этилиши ҳақида сўз борди.

Қизғин савол-жавоб кўринишида ўтган матбуот анжуманида журналистлар ўзларини қизиқтирган яна кўплаб саволларга жавоб олишди.