Ўзбекистон Республикаси Марказий банки томонидан Россия Федерациясининг “Газпромбанк” акциядорлик жамияти ваколатхонаси аккредитация қилинди. Бу ҳақда Марказий банк расмий телеграм каналида маълум қилинди.

"Ваколатхона Ўзбекистоннинг давлат органлари, молия-кредит ташкилотлари, таълим муассасалари ва хўжалик юритувчи субъектлари билан алоқаларни ўрнатиш, уларни қўллаб-қувватлаш ва ривожлантириш, банкнинг Ўзбекистонда халқаро бизнесини ривожлантиришга кўмаклашиш, шунингдек, банк томонидан Ўзбекистонда амалга оширилаётган ташаббус ва лойиҳаларни қўллаб-қувватлаш мақсадида ташкил этилди", дейилади регулятор хабарида.

Газпромбанк 2020 йилнинг сентябрида Ўзбекистонда ваколатхона очишга қарор қилган эди. Қарор банкнинг Директорлар кенгаши томонидан қабул қилинган.

Марказий банк маълумотига кўра, ҳозирга қадар Ўзбекистонда 6 та хорижий банк ваколатхоналари фаолият юритмоқда. Булар — "J.P. Morgan Chase Bank" (АҚШ), "Kyongnam Bank" ;(Корея Республикаси), "Commerzbank AG" (Германия), "Korea Eximbank" (Корея Республикаси), "Landensbank Baden-Wurttemberg (Германия) ва "Shinhan bank" (Корея Республикаси).

2020 йил августида Покистон Миллий банкининг 1995 йилдан бери Тошкентда фаолият юритиб келаётган ваколатхонаси ёпилган эди.