Ipoteka bank OTP Group бошқарувидаги ўзгаришлар ҳақида хабар берди. Хусусан, банк акциядорларининг 28 октбярда бўлиб ўтган йиғилиши қарори билан бошқарув раиси ўринбосари лавозимига Михаил Алексеевич Данилин ва Мартон Миклош Ратки уч йил муддатга тайинланган. Тайинловлар Марказий банкнинг ёзма розилиги олингач расман кучга киради.

М.Данилин 2025 йил сентябридан буён банкнинг Рақамли технологиялар дирекциясини бошқариб келган. Янги лавозимида у бутун IT блокига масъул бўлади. Маълумотларга кўра, М.Данилин 1984 йилда Москва вилоятида туғилган. 2006 йилда Москва давлат асбобсозлик ва информатика университетини, 2009 йилда Россия Федерацияси Ҳукумати ҳузуридаги Халқ хўжалиги академиясини тамомлаган.

^{Михаил Данилин / Фото: Spot.uz}

У меҳнат фаолиятини 2005 йилда Standard Bank'да (Россия) лойиҳа менежери сифатида бошлаган. Кейинчалик Промсвязьбанк, «Траст» миллий банки, Росинтербанк, Нота-Банк, «Открытие», «Восточный экспресс» ва Уралсиб банкларида маҳсулот ва хизматларни ишлаб чиқиш йўналишида ишлаган. Хусусан, 2015–2018 йилларда «Открытие» банкида корпоратив маҳсулотларни ривожлантириш департаменти директори бўлган. 2021 йил январидан 2025 йил сентябригача эса Альфа-Банкда транзакцион маҳсулотлар (корпоратив рақамли банкинг) йўналишига раҳбарлик қилган.

Стратегия ва молия блокини бошқарадиган М.Ратки 2024 йил апрелидан банкнинг Молиявий ҳисобот дирекциясига раҳбарлик қилиб келган.

^{Мартон Ратки / Фото: LinkedIn}

М.Ратки 1996 йилда Будапештда туғилган. Шу ердаги Корвинус университетида бухгалтерия ҳисоби ва молия йўналиши бўйича бакалавр (2019), бухгалтерия ҳисоби бўйича магистр (2022) даражасини олган. LinkedIn саҳифасида кўрсатилишича, ўқиш даврида Нидерландиядаги Маастрихт университетида алмашинув семестрини ўтаган, 2021 йил кузида эса Queen's University'нинг MBA дастурида таҳсил олган.

Банк соҳасидаги фаолиятини 2018 йилда OTP Bank'нинг Будапештдаги бош офисида стратегик режалаштириш бўйича маслаҳатчи сифатида бошлаган. 2022–2023 йилларда OTP Bank'нинг Албаниядаги шўъба банки молия бўлинмасида молиявий таҳлилчи бўлиб ишлаган. 2023 йил июнидан Ипотека-банкнинг OTP Group'га молиявий интеграцияси устида ишлаган. М.Ратки LinkedIn'да ёзишича, у Молиявий ҳисобот дирекциясига раҳбарлик қилган даврда банк МҲХС бўйича ҳисоботни йилига икки марта, 180 кунгача вақт сарфлаб фақат Excel'да тайёрлашдан ҳар ойлик ҳисоботга ўтган, уларнинг ҳар бири беш иш кунидан кам вақтда тайёрланади. МҲХС трансформациялари SQL муҳитида автоматлаштирилган, харажатларни тақсимлаш ҳамда маҳсулот ва бизнес йўналишлари рентабеллиги бўйича маълумотлар моделлари ишлаб чиқилган.

Бундан ташқари, М.Ратки 2023 йилда Венгрия Марказий банкининг «Hitelintézeti Szemle» илмий журналида Корвинус университети ўқитувчиси Эва Гуляш билан ҳамкорликда мақола чоп эттирган. Унда давлат томонидан субсидияланадиган чакана кредитларни МҲХС 9 стандарти бўйича ҳисобга олиш масаласи таҳлил қилинган.

Маълумот учун, стратегия ва молия блокига 2023 йилдан Адам Сентпетери жорий йил 3 июндан дастлаб бошқарув раиси вазифасини бажарувчи ва кейинчалик эса (27 июлдан) бошқарув раиси этиб тайинланганди. Ўша йиғилишда корпоратив банк хизматлари ва бозор инструментлари блоки раҳбари Иракли Элашвили ҳамда операцион блок раҳбари Максим Быков билан тузилган меҳнат шартномалари томонларнинг келишувига кўра муддатидан олдин бекор қилинганди.