Марказий банк эсдалик ва инвестицион тангаларнинг янги коллекциясини муомалага чиқарди. Тўпламдаги ҳар бир танга мустақиллик даврининг рамзлари ва давлат рамзлари қабул қилинган саналарга боғланган алоҳида композицияда ишланган.

Биринчи танганинг аверсида Мустақиллик монументи, монумент ортидан таралаётган қуёш нурлари билан бирга тасвирланган. Реверс қисмида Ўзбекистон Республикасининг Давлат байроғи ва у қабул қилинган сана — 1991 йил 18 ноябрь акс эттирилган.

^{Фото: Марказий банк}

Иккинчи танга тарихий ва маънавий меросга бағишланган: аверсида Тошкент шаҳридаги Ислом цивилизацияси маркази тасвирланган, реверсида Давлат герби ва унинг қабул қилинган санаси — 1992 йил 2 июль берилган.

Учинчи танганинг асосий композицион элементи — «35» рақами. Реверс қисмида Давлат мадҳиясидан олинган сатр ҳамда Мадҳия қабул қилинган сана — 1992 йил 10 декабрь акс эттирилган, дизайнда дўппи нақшларидан фойдаланилган.

^{Фото: Марказий банк}

Барча тангалар 999,9 асилликдаги олтин (Au) ва кумушдан (Ag) зарб этилган. Ҳар бир танганинг оғирлиги 31,1 грамм, номинал қиймати 100 минг сўмни ташкил қилади. Тангалар учтадан иборат коллекция тўплами кўринишида ҳам, алоҳида-алоҳида ҳам сотилади. Марказий банк маълумотига кўра, тираж бозор эҳтиёжидан келиб чиқиб оширилиши мумкин.

Сотув Ўзбекистон бўйлаб 690 та тижорат банклари филиалларида ташкил этилган. Сотув нархлари ва тангаларнинг банклардаги мавжудлиги бўйича маълумотлар Марказий банкнинг расмий веб-сайтида ҳар куни янгиланиб борилади.

Оператив маълумотларга кўра, 2026 йил 28 август ҳолатига банк бўлинмаларида 184 та алоҳида олтин танга ва 9 та олтин тўплам, шунингдек 282 та алоҳида кумуш танга ва 55 та кумуш тўплам қолган. Тўпламдаги учта танга ҳисобга олинганда, бу дастлабки тиражнинг олтин бўйича қарийб 47 фоизига, кумуш бўйича 56 фоизига тўғри келади (ҳисоб-китоб — таҳр.). Бошқача айтганда, сотув бошланганига икки кун бўлганида зарб этилган тангаларнинг ярмига яқини сотиб олинган.

^{Манба: Марказий банк}

Эслатиб ўтамиз, эсдалик тангаларининг сотиш ва қайта харид қилиш нархлари Марказий банк томонидан алоҳида эълон қилиб борилади, тангаларнинг банк бўлинмаларидаги қолдиғи эса кунлик маълумот сифатида жойлаштирилади.