Ички ишлар вазирлигида жорий йилнинг иккинчи чорагида амалга оширилган ишлар якунига бағишланган йиғилиш бўлиб ўтди. Йиғилиш ички ишлар вазири, генерал-лейтенант Азиз Ташпулатов раҳбарлигида ўтказилди. Унда республика ҳудудидаги криминоген вазият, оғир ва ўта оғир жиноятлар, жамоат хавфсизлигини таъминлаш, хизмат интизоми ҳамда фуқаролар мурожаатлари билан ишлаш масалалари кўриб чиқилди.

Кун тартибидаги алоҳида масалалардан бири кибержиноятларга қарши курашиш бўлди. Вазирлик тизимида 2026 йил «Кибержиноятларга қарши курашиш йили» деб эълон қилинган бўлиб, бу борада эришилган натижалар оралиқ сарҳисоб қилинди.

^{Фото: ИИВ}

Маълум қилишинишча, 2026 йилнинг ўтган даври мобайнида жами 9 282 та кибержиноят фош этилган, улардан 4 011 таси (тахминан 43 фоизи - таҳр.) ички ишлар органлари ташаббуси билан, яъни фуқаронинг мурожаатисиз аниқланган. Фуқароларга мазкур жиноятлар натижасида етказилган 120 млрд 496 млн сўмлик моддий зарар қайтарилган. Бу ҳар бир жабрланувчига ўртача 9,3 миллион сўмдан демакдир.

Маълум қилинишча, кибержиноятларга қарши жорий қилинган тизим доирасида Марказий банк, тўлов тизимлари ва ички ишлар органлари вакилларидан иборат тезкор гуруҳ ишлайди. Гуруҳ шубҳали пул ўтказмалари билан боғлиқ банк карталарини аниқлаб блоклайди ва ўғирланган маблағнинг мамлакатдан ташқарига чиқарилишига йўл қўймайди.

Йиғилишда кибержиноятларга қарши профилактик тарғибот ишлари билан аҳолининг қарийб 23 миллиондан ортиқ қисми қамраб олингани қайд этилди.

^{Фото: ИИВ}

Шу билан бирга, йиғилишда амалга оширилаётган ишлар етарли эмаслиги танқид қилинди. Масъулларга фуқаролардан келиб тушаётган мурожаатларни ҳар томонлама ўрганиш, кибержиноятларнинг содир этилиш сабабларини ва уларга имкон бераётган омилларни чуқур таҳлил қилиш вазифаси қўйилди. Ходимларнинг киберхавфсизлик соҳасидаги билим ва кўникмаларини мунтазам ошириб бориш ҳам вазифа сифатида белгиланди.

Эслатиб ўтамиз, Президент Шавкат Мирзиёев жорий йил бошида ўтказилган йиғилишда Ички ишлар вазирлигида ташкил қилинган кибержиноятчиликка қарши курашиш бошқармасининг иши ҳали кўринмаётганини танқид қилган эди. Шунингдек, ўтган йил 3 ноябрь куни бўлиб ўтган тақдимотда давлат раҳари сўнгги беш йилда Ўзбекистонда кибержиноятлар сони 68 баробарга кўпайгани, бир йилнинг ўзида 46 мингдан ортиқ кибержиноят аниқланиб, улар орқали жисмоний ва юридик шахсларга 1,2 трлн сўм моддий зарар етказилганини таъкидлаб, ушбу йўналишдаги ишларни танқид қилган эди.