Жорий йилнинг 27 июлидан бошлаб Адам Сентпетери (Ádám Szentpéteri) Ipoteka bank OTP Group бошқаруви раиси этиб тайинланди. У 3 июндан буён Бошқарув раиси вазифасини вақтинча бажарувчи сифатида фаолият юритиб келаётган эди ва эндиликда ушбу лавозимдаги фаолиятини расмий равишда давом эттиради.

Янги лавозимида Адам Сентпетери Ipoteka bank OTP Group’нинг стратегик мақсадларини амалга ошириш ҳамда бизнеснинг барқарор ўсишини таъминлашга алоҳида эътибор қаратади. Унинг тайинлови банкнинг стратегик ривожланиш йўналишларидаги изчилликни сақлаш, трансформация жараёнларини давом эттириш ва Ipoteka bank OTP Group’нинг молия бозоридаги етакчи мавқеини янада мустаҳкамлашга хизмат қилади.

«Биз бошланган трансформация жараёнларини изчил давом эттирамиз. Олдимизда банкнинг молия бозоридаги мавқеини мустаҳкамлаш, замонавий хизматларни ривожлантириш ҳамда регулятор ва давлат органлари билан самарали ҳамкорликни таъминлаш каби муҳим вазифалар турибди», — деди Ipoteka bank OTP Group Бошқаруви раиси Адам Сентпетери.

Адам Сентпетери меҳнат фаолиятини 2005 йилда OTP Group’да макроиқтисодий таҳлилчи сифатида бошлаган. Кейинчалик чакана бизнес, контроллинг ва стратегик бошқарув йўналишларида раҳбарлик лавозимларида ишлаган. Шунингдек, у 2012–2018 йилларда Украинадаги OTP Bank Кузатув кенгаши аъзоси, 2018–2022 йилларда Россиядаги OTP Bank Директорлар кенгаши аъзоси, 2022–2023 йилларда эса Албаниядаги OTP Bank молия директори ва Директорлар кенгаши аъзоси сифатида фаолият юритган.

«Ушбу тайинлов OTP Group’нинг банкнинг стратегик ривожланиш йўлига бўлган ишончини тасдиқлайди. Адам Сентпетери раҳбарлигида банк белгиланган мақсадларни амалга ошириш ва бозордаги мавқеини мустаҳкамлашни давом эттиради», — деди Ipoteka bank OTP Group Кузатув кенгаши раиси ва OTP Group бош директори ўринбосари Ласло Вольф (László Wolf).

Маълумот учун, Ipoteka bank OTP Group 2026 йилнинг I чорагини ХМҲС (IFRS) бўйича 579,2 млрд сўм (47,7 млн АҚШ доллари) соф фойда билан якунлаган. Бу кўрсаткич ўтган йилнинг мос даврига нисбатан 32,9 фоизга кўп.