2026 йилнинг 1 июль ҳолатига кўра, банк тизимидаги жами депозит базаси 473,7 трлн сўмни ташкил этди. Йил бошидаги 417,2 трлн сўмлик кўрсаткичга нисбатан умумий база 13,5 фоизга, яъни 56,5 трлн сўмга ошган.

Хусусан, сўмдаги депозитлар 16,2 фоизга (53,3 трлн сўмга) кўпайиб, 383,3 трлн сўмга етди ва уларнинг жами базадаги улуши қарийб 80,9 фоизни ташкил қилмоқда.

Умумий ўсишнинг қарийб 95 фоизи айнан миллий валютадаги маблағлар ҳисобидан таъминланди.

^{Манба: Оператив маълумотлар}

Шу билан бирга, хорижий валютадаги депозитлар бор-йўғи 3,6 фоизга (3,1 трлн сўм эквивалентига) ўсиб, 90,4 трлн сўм эквивалентни ташкил қилди. Таҳлилчиларга кўра, бу ҳолат асосан сўм курсининг ўзгариши ҳисобига юз берган номинал ўсиш бўлиши мумкин.

Ушбу тенденция фонида валюта омонатларининг умумий базадаги улуши йил бошидаги 20,9 фоиздан 19,1 фоизгача пасайди. Бу эса аҳоли ва бизнес вакиллари ўз пулларини тобора кўпроқ миллий валютада сақлашни афзал кўраётганини англатади.

Мутлақ қийматда ўсиш бўйича йирик давлат банклари етакчилик қилмоқда. Хусусан, энг кўп ўсишни 4 та давлат банки қайд этди:

• Агробанк: +9,68 трлн сўмга (+28,8%) ўсган.
• Ўзмиллийбанк: +7,49 трлн сўмга (+14,8%) ошган.
• Ўзсаноатқурилишбанк: +6,73 трлн сўмга (+21,4%) кўпайган.
• Халқ банки: +4,10 трлн сўмга (+15%) кўпайган.

Шунингдек, Октобанк (+3,96,+37%), Капиталбанк (+2,98, +7%), Трастбанк (+2,50, +26%), Микрокредитбанк (+2,39, +25%), Анорбанк (+2,39, +18%) ва Ҳаётбанк (+2,35, +48%) депозит базасининг миқдорий ўсиши бўйича етакчи 10 ликка кирган.

Фоиз ҳисобида (нисбий) энг тез ўсган банклар қаторидан эса ўрта ва кичик банклар ўрин олди:

• Апексбанк: +70,0% (+1,4 трлн сўм).
• Тенге банк: +57,0% (+1,39 трлн сўм).
• Ҳаётбанк: +47,6% (+2,3 трлн сўм).
• Октобанк: +36,6% (+3,9 трлн сўм).

Умумий ўсиш фонида баъзи банкларнинг депозит базаси қисқаргани кузатилди. Бу асосан хорижий валюта базаси устун бўлган банкларга тегишли:

• Ориент Финанс банк депозит базаси -850,5 млрд сўмга (-6,8%) камайди. Бунга асосан банкдаги хорижий валюта омонатларининг 37 фоизга қисқариши сабаб бўлган.
• КДБ Банк Ўзбекистон: -590,9 млрд сўмга (-8,1%) пасайди.
• Асакабанк: -364,7 млрд сўмга (-1,7%) камайди.

Фоиз ҳисобида энг кескин пасайиш Пойтахт банкда кузатилди — унинг депозит базаси учдан бирга, яъни 33,2 фоизга (-90 млрд сўм) қисқарган.