"Ўзбекистон ипотекани қайта молиялаштириш компанияси" АЖ акциядорларининг 2026 йил 25 июнда бўлиб ўтган умумий йиғилиши қарорига асосан жамият Кузатув кенгаши таркибида ўзгаришлар амалга оширилди. Бу ҳақда Корпоратив ахборот ягона порталида маълум қилинди.

Хусусан, қарорга мувофиқ, Кузатув кенгаши таркибидан икки аъзо Hult International Business School доценти Ҳамид Иргашев ҳамда "Ипотека-банк" АТИБ бошқарув раиси маслаҳатчиси Жўрабек Зулфуқоров чиқарилган.

^{Alkis Ioakeim Vryenios Drakinos. Фото: LinkedIn}

Кенгашнинг янги таркибига халқаро тажрибага эга икки мустақил аъзо қабул қилинган. Булар Европа тикланиш ва тараққиёт банкининг Кавказ минтақаси бўйича бош директори Алкис Иоаким Вриеньос Дракинос (Alkis Ioakeim Vryenios Drakinos) ҳамда инвестиция ва корпоратив банк тизимида 20 йиллик тажрибага эга, ҳозирда Грузия пенсия жамғармаси Кузатув кенгаши аъзоси ҳисобланган Леван Шавкацишвилидир.

^{Леван Шавкацишвили. Фото: Georgia Today}

Шу билан бирга, Жасур Қаршибаев (Иқтисодиёт ва молия вазири маслаҳатчиси), Илхом Худайберганов (Бизнесни ривожлантириш банки Молиявий ресурсларни бошқариш бўйича бош директори) ва Иқболжон Мамаджанов (Ўзмиллийбанк Чакана бизнес блоки бошқарувчи директори) Кузатув кенгашининг янги таркибидан ҳам жой олган.

Шу тариқа, ЎзИҚМК Кузатув кенгаши аъзолари сони 7 нафарга етган. Улардан 4 нафари Kokularupan Narayanasamy, Klepikova Yelena Grigoryevna, Alkis Ioakeim Vryenios Drakinos ва Леван Шавкацишвили мустақил аъзолар сифатида фаолият юритади.