2026 йил 1 июнь ҳолатига кўра, тижорат банклари тизимида муаммоли кредитлар (NPL) улуши 3,71 фоизга етди. Бир ой аввал, 1 май ҳолатига, бу кўрсаткич 3,48 фоизни ташкил этган эди. Шундай қилиб, ой давомида банк тизимида муаммоли кредитлар улуши 0,23 фоиз бандга ошган. Миқдор жиҳатдан муаммоли кредитлар ҳажми 21,9 трлн сўмдан 23,6 трлн сўмгача, яъни 1 трлн 692 млрд сўмга кўпайди.

^{Манба: тижорат банкларининг 2026 йил 1 май ва 1 июнь ҳолатига муаммоли кредитлар (NPL) бўйича маълумотлари}

Бутун тизим бўйича жами кредит портфели қарийб 629,0 трлн сўмдан 636,0 трлн сўмгача кенгайди — портфель ой давомида 6 трлн 979 млрд сўмга (тахминан 1,1 фоизга) ўсди. Давлат улуши мавжуд банкларда портфель 417,3 трлн сўмдан 420,4 трлн сўмгача, бошқа банкларда эса 211,7 трлн сўмдан 215,5 трлн сўмгача кўтарилди.

Мутлақ ифодада кредит портфелини энг кўп оширган банк Агробанк бўлди (+1 трлн 836,0 млрд сўм). Ундан кейин Микрокредитбанк (+757,5 млрд сўм), Ҳамкор банк (+647,6 млрд сўм), Ипак йўли банк (+524,4 млрд сўм), Халқ банки (+393,7 млрд сўм) ва Алоқа банк (+353,6 млрд сўм) ўрин олди.

Нисбий ўсиш суръати бўйича асосан кичик банклар ажралиб турди. Узум банк кредит портфелини 76,1 млрд сўмдан 241,5 млрд сўмгача — уч баробардан зиёд (+217 фоиз) оширди. Юқори суръатларни Пойтахт банк (+10,7 фоиз), Апекс банк (+10,4 фоиз) ва Азия Альянс банк (+6,6 фоиз) ҳам намойиш этди.

Айни пайтда айрим йирик банкларда кредит портфели аксинча қисқарди. Энг катта пасайиш Ўзсаноатқурилишбанкда қайд этилди (−542,9 млрд сўм). TBC банк (−220,3 млрд сўм) ва Асака банк (−100,4 млрд сўм) портфели ҳам камайди; Зираат банк ҳамда Содерот банкда нисбатан кичик қисқариш кузатилди.

Муаммоли кредитлар банклар кесимида

Ой давомида муаммоли кредитлар ҳажми тизим бўйича ўсди, бунда асосий ҳисса бир нечта (асосан давлат) банклар зиммасига тушди. Энг катта ўсиш Микрокредитбанкда қайд этилди: NPL ҳажми 958,9 млрд сўмдан 1 780,9 млрд сўмгача, яъни 822,0 млрд сўмга ошди, банк портфелидаги улуши эса 4,40 фоиздан 7,89 фоизгача сакради. Иккинчи ўринда Халқ банки турибди — муаммоли кредитлар 658,7 млрд сўмга кўпайди (улуши 2,99 фоиздан 4,74 фоизгача). Сезиларли ўсиш Асакабанк (+261,2 млрд сўм; 4,19 → 4,85 фоиз), Анор банк (+235,6 млрд сўм; 5,79 → 7,66 фоиз), TBC банк (+148,7 млрд сўм; 8,40 → 10,35 фоиз) ва Гарант банкда (+65,9 млрд сўм; 10,32 → 13,91 фоиз) ҳам кузатилди.

Ой якунида муаммоли кредитлар улуши энг юқори банклар Гарант банк (13,91 фоиз), TBC банк (10,35 фоиз) ва Пойтахт банк (9,89 фоиз) бўлди — улар тизим ўртачасидан анча юқори даражада.

Бошқа томондан, бир қатор банклар муаммоли кредитларни сезиларли даражада сўндиришга эришди. Энг кескин камайиш Мадад инвест банкда юз берди: NPL ҳажми 296,4 млрд сўмдан 26,3 млрд сўмгача — 270,1 млрд сўмга қисқарди, натижада муаммоли кредитлар улуши 50,76 фоиздан 4,42 фоизгача тушди. Капитал банк муаммоли кредитларни 189,5 млрд сўмга (3,95 → 3,43 фоиз), Ўзсаноатқурилишбанк 130,4 млрд сўмга (3,67 → 3,49 фоиз) камайтирди. Шунингдек, Ўзмиллийбанк (−34,1 млрд сўм), Ипотека банк (−28,6 млрд сўм), Ҳаёт банк (−19,0 млрд сўм) ва Алоқа банкда (−18,6 млрд сўм) муаммоли кредитлар ҳажми пасайди.