S&P Global Ratings халқаро рейтинг агентлиги «Hayot Bank» АЖ учун «B-/B» даражасидаги кредит рейтингларини ва «Барқарор» истиқболини белгилади. Ушбу рейтинг банкнинг молия бозоридаги мавқеини мустаҳкамлаш ҳамда инвестицион жозибадорлигини ошириш йўлидаги кўрсаткичлардан бири ҳисобланади.

Рейтинг таркиби ва агентлик баҳоси

Агентлик ҳисоботига кўра, «Hayot Bank»га «B-» даражасидаги узоқ муддатли эмитент кредит рейтинги ва «B» даражасидаги қисқа муддатли кредит рейтинги берилди. Рейтинг истиқболи «Барқарор» деб баҳоланган.

S&P Global Ratings экспертларининг қайд этишича, берилган баҳо банкнинг Ўзбекистон банк хизматлари бозорида шаклланиб бораётган ўрнини, кичик ва ўрта бизнес (КЎБ) ҳамда якка тартибдаги тадбиркорлар билан ишлашга қаратилган стратегиясини акс эттиради. Шунингдек, агентлик томонидан банкнинг профессионал бошқарув жамоаси ва пухта ишлаб чиқилган ўрта муддатли ривожланиш режалари ижобий баҳоланган.

2023 йилнинг март ойида ташкил этилган ушбу хусусий банк уч йилдан кам вақт ичида халқаро баҳолаш даражасига чиқди. Бу кўрсаткич мамлакат банк тизимидаги таркибий ўзгаришлар, жумладан, бозор очиқлигининг ортиши, рақобат муҳитининг кучайиши ва хусусий банк секторининг ривожланиши фонида қайд этилди.

«Барқарор» прогнозининг мазмуни

S&P Global Ratings’нинг «Барқарор» истиқболи агентлик томонидан яқин 12 ой давомида банк акциядорлар кўмаги, бозордаги мавқеининг кенгайиши ва тақсимланмаган фойданинг ўсиши ҳисобига ўз капитал захирасини минимал регулятив талаблардан юқори даражада сақлаб бориши кутилаётганини англатади.

Банк раҳбариятининг маълум қилишича, рейтингнинг қўлга киритилиши мамлакат молия секторини модернизация қилиш, валюта тартибга солинишини либераллаштириш ва глобал молия тизимига интеграциялашув жараёнлари билан бевосита боғлиқ.

«Hayot Bank» Бошқаруви раисининг таъкидлашича, S&P Global Ratings рейтинглари банк томонидан бир томондан ишонч кўрсаткичи, иккинчи томондан эса фаолиятни янада юқори стандартларга мувофиқлаштириш мажбурияти сифатида қабул қилинмоқда. Банк секторидаги ислоҳотлар ва хусусий бизнес учун тенг шароитлар яратилгани қисқа давр ичида халқаро эътирофга эришишга замин бўлган.

Инвесторлар ва мижозлар учун аҳамияти

Халқаро рейтингнинг мавжудлиги «Hayot Bank»нинг ташқи молиявий бозорларда ишлаш ва хорижий инвесторларни жалб қилиш имкониятларини кенгайтиради. Халқаро инвесторлар ва молиявий институтлар учун S&P Global Ratings баҳоси банкнинг барқарорлиги ва бошқарув сифати бўйича муҳим мезон ҳисобланади. Бу эса келгусида халқаро молиявий ресурслардан фойдаланиш имкониятларини оширади.

Банк мижозлари учун эса халқаро ҳамкорликнинг ривожланиши тижорий маҳсулотлар турининг кенгайишига, бизнес учун янги имкониятлар яратилишига ҳамда хорижий молиялаштириш инструментларидан қулай шартларда фойдаланишга хизмат қилиши мумкин.

Банк ҳақида маълумот:

«Hayot Bank» акцияорлик жамияти 2023 йил март ойида ташкил этилган бўлиб, Ўзбекистон Республикаси Марказий банкининг 91-сонли лицензияси асосида фаолият юритади. Банк жисмоний ва юридик шахсларга молиявий хизматлар кўрсатади, HUMO ва UZCARD тўлов тизимлари аъзоси ҳисобланади ҳамда SWIFT халқаро тармоғига уланган.

2026 йил апрель ҳолатига кўра, банкнинг умумий активлари 7,4 триллион сўмни (тахминан 620 миллион АҚШ доллари) ташкил этади.

Ҳамкорлик асосида