«Tenge Bank» АТБ Кузатув кенгашининг 2026 йил 28 апрелдаги қарорига мувофиқ, Дониёр Марсельевич Абдурахманов банк бошқаруви раисининг ўринбосари лавозимига тайинланди. Мазкур тайинлов Ўзбекистон Республикаси Марказий банки билан тегишли тартибда келишилган. Шу муносабат билан, Д.М.Абдурахмановнинг «Tenge Bank» АТБ Кузатув кенгашининг мустақил аъзоси сифатидаги ваколатлари муддатидан олдин тугатилиб, у 2026 йилнинг 8 май санасидан эътиборан янги лавозимида ўз фаолиятини бошлаган.

Дониёр Абдурахманов 1982 йил 6 июнда туғилган. У Тошкент Молия институтини «Молия» йўналиши бўйича, 2013 йилда Ўзбекистон Республикаси Банк-молия академиясининг магистратурасини «Инвестицияларни бошқариш» мутахассислиги бўйича тугатган. Шунингдек, у Швейцария Миллий банкининг Ўқув марказида «Пул-кредит сиёсати, валюта курслари ва капитал ҳаракати» йўналишида таҳсил олган ва 2019 йилда Австриядаги Бирлашган Вена институтида «Капитал оқимини бошқариш: макроиқтисодий таҳлил ва сиёсат» ҳамда «Баланс ёндашуви» дастурлари бўйича малака оширган.

Д.Абдурахманов банк-молия тизимида кўп йиллик тажрибага эга. У меҳнат фаолиятини 2003 йилда Ўзбекистон Республикаси Ташқи иқтисодий фаолият миллий банкида ҳуқуқий маслаҳатчи сифатида бошлаган. 2005-2014 йиллар давомида Ўзбекистон Республикаси Марказий банкида Валюта айирбошлаш операциялари бош бошқармаси таҳлил бошқармасининг раҳбар ўринбосари, Консолидациялашган барқарорлаштириш фондининг Ишчи органи раҳбари ўринбосари, Капитал ҳаракати операцияларини мониторинг қилиш бошқармаси раҳбари ҳамда Валютани тартибга солиш ва назорат департаментида бошқарма бошлиғи вазифаларида меҳнат қилган.

2014-2016 йилларда «Intermobilgaz» МЧЖда юрист, 2016-2017 йилларда «Ravnaqbank» АТБ Валюта операциялари департаменти директори ва 2017 йилда «Davr bank» АТБ Валюта операциялари бошқармаси бошлиғи сифатида фаолият юритган.

У 2017 йилдан 2020 йилга қадар яна Ўзбекистон Республикаси Марказий банкида Валютани тартибга солиш ва тўлов баланси департаменти директори лавозимида ишлаган.

Дониёр Абдурахманов 2020 йилнинг август ойидан буён эса «Tenge Bank» АТБ Кузатув кенгашининг мустақил аъзоси сифатида фаолият кўрсатиб келаётган эди.