Жорий йилнинг 26 апрель куни Тошкентда OSON компанияси ходимлари ўртасида Counter-Strike 2 бўйича биринчи корпоратив чемпионат бўлиб ўтди. Турнир турли бўлимлар жамоаларини бирлаштириб, ички корпоратив маданиятни ривожлантиришга қаратилган ташаббусларнинг муҳим бир қисмига айланди.

Мусобақада 8 та жамоага бўлинган 40 нафар ходим иштирок этди. Уларнинг таркибидан дастурлашдан тортиб маркетинггача бўлган турли йўналиш вакиллари ўрин олгани жамоалараро ҳамкорлик ва мулоқотни янада кучайтиришга хизмат қилди. Турнир профессионал киберспорт мусобақаларига яқин форматда, яъни вазифалар тақсимоти, жамоавий стратегия ва чиқиб кетиш тизимидаги ўйинлар серияси асосида ўтказилди. Иштирокчилар рақибларнинг ўйин услубига тезкор мослашиб, барча босқичларда юқори даражадаги фаолликни намойиш этишди.

Бу каби ташаббуслар жамоавий ишни ривожлантириш ва ходимлар ўртасидаги ички алоқаларни мустаҳкамлашга қаратилган. Ўйин форматлари иштирокчиларга профессионал муҳитда ҳам доимий талаб этиладиган муҳим кўникмаларни — стратегик фикрлаш, тезкор қарор қабул қилиш ва жамоада самарали ҳамкорлик қилишни намоён этиш имконини беради.

Шуни алоҳида таъкидлаш мумкинки, OSON учун киберспорт йўналишини ривожлантириш тизимли ишларнинг бир қисми ҳисобланади. Аввалроқ компания Истанбулда бўлиб ўтган GEG 2022 халқаро ўйинларида PUBG Mobile бўйича Ўзбекистон терма жамоасининг расмий ҳомийси сифатида иштирок этган, шунингдек, ушбу йўналиш бўйича ўз турнирини ҳам ташкил қилган эди. Навбатдаги корпоратив чемпионатнинг ўтказилиши мазкур стратегиянинг мантиқий давоми бўлиб, компаниянинг замонавий рақамли муҳит ва воситалар орқали жамоани ривожлантиришга бўлган ёндашувини акс эттиради.