«Pulse» нашрининг маълумотларига кўра, Ўзбекистонда Shinhan Bank’нинг тўлақонли шўъба банки очилади. Бу «Shinhan Financial Group» раисининг хорижий бозорларга чиқиш стратегияси доирасидаги биринчи йирик халқаро лойиҳа бўлади.Таъкидланишича, ушбу банкни очиш бўйича тайёргарлик ишларининг катта қисми аллақачон якунига етказилган. Хусусан, 2026 йилнинг биринчи ярмида Марказий банкка расмий ариза киритилиши режалаштирилган бўлса, 2027 йилда янги банк тўлиқ қувватда иш бошлаши мақсад қилинган.

Shinhan Bank 2009 йилда Ўзбекистонда ўз ваколатхонасини очган, ундан бир йил олдин эса Қозоғистонда шўъба банкини ишга туширган эди. 2024 йилда Жанубий Корея банки вакиллари маҳаллий молия органлари билан расмий музокараларни бошлаш мақсадида Ўзбекистонга ташриф буюришган. Ўтган йилнинг апрель ойида эса бу жараёнга Shinhan Financial Group раиси ҳам қўшилган.

2025 йилнинг февраль ойида Ўзбекистон Марказий банки ва Shinhan Bank вакиллари давлат банкларини хусусийлаштириш масаласини муҳокама қишганди. Учрашувда Жанубий Корея томони яқин келажакда Ўзбекистон банк бозорида ўз ўрнини кенгайтириш ва мустаҳкамлаш режаларини маълум қилганди.

Shinhan Bank - «Shinhan Financial Group» таркибига кирувчи Жанубий Кореянинг етакчи молия гуруҳи. Банк «The Banker» нашрининг «Топ-1000 жаҳон банклари» рейтингида дунёнинг энг кучли 100 та банки қаторидан жой олган. Бугунги кунда банк дунёнинг 20 та давлатида 160 дан ортиқ шўъба корхоналари ва бўлимларига эга. Хусусан, у АҚШ, Буюк Британия, Германия, Хитой ва Япония каби йирик молия марказларида фаолият юритади. 

Эслатиб ўтамиз, Ўзбекистонда Жанубий Корея капитали иштирокидаги KDB Bank Uzbekistan 1997 йилдан буён фаолият юритиб келмоқда. Ушбу банк 2006 йилда Корея тараққиёт банки (KDB) томонидан сотиб олинган бўлиб, ҳозирда корпоратив мижозларга хизмат кўрсатиш йўналишида Ўзбекистонда етакчи ўринлардан бирида туради.

Марказий банк реестри маълумотларига кўра, ҳозирги кунда Ўзбекистонда 8 та хорижий банкнинг ваколатхонаси ишламоқда. Улардан иккитаси Жанубий Корея банкларига (Korea Eximbank ва Shinhan Bank), яна иккитаси Германияга (Landesbank Baden-Württemberg ва Commerzbank AG) тегишли. Шунингдек, АҚШ (JP Morgan Chase), Россия ("Газпромбанк"), Хитой (Эксимбанк) ва Туркия (Citibank AS) банкларининг ҳам биттадан офислари мавжуд.