Марказий банкнинг Банк назорати қўмитаси томонидан 2026 йилнинг март ойида ўтказилган жами еттита йиғилиш давомида молия-банк тизимига оид йигирма тўққизта масала кўриб чиқилиб, улар юзасидан тегишли қарорлар қабул қилинди.

Кўриб чиқилган масалаларнинг ўн еттитаси бевосита рўйхатга олиш ва рухсат бериш йўналишини қамраб олди. Ушбу йўналиш доирасида кредит ташкилотлари уставига киритилган ўзгартиришларни рўйхатдан ўтказиш, устав фондидаги улушга эгалик қилишга рухсат бериш ҳамда банкларда аудит ўтказиш ҳуқуқини берувчи аудиторлик малака сертификатини тақдим этиш каби жараёнлар муҳокама қилинди. Шунингдек, тижорат банкларининг кузатув кенгаши ва бошқаруви аъзолигига ҳамда бошқа муҳим аҳамиятга эга лавозимларга тавсия этилган ўнлаб номзодлар кўриб чиқилди.

Шу билан бирга, Қўмита томонидан кредит ташкилотларининг молиявий ҳолатига оид ўн иккита масала таҳлил қилинди. Жумладан, Марказий банк кўрсатмалари ва пруденциал меъёрлар талабларининг бажарилиш ҳолати, банк ва нобанк кредит ташкилотларида ўтказилган инспекция ҳамда ўрганишлар натижалари, бундан ташқари, ташкилотларнинг янги молиявий хизматларини «тартибга солиш қумдони» доирасида синовдан ўтказиш масалалари кўриб чиқилди.

Қонунчилик талабларига мувофиқ ўз фаолиятини тизимли ташкил этмаганлиги ҳамда инспекция ва ўрганишлар давомида аниқланган жиддий камчиликлар сабабли 20 та тижорат банки, 89 та микромолия ташкилоти ва 79 та ломбардга нисбатан жарима санкциялари қўлланилди.

Бу Марказий банк томонидан кредит ташкилотларига қўлланилаётган жарималар очиқланаётган давр учун рекорд кўрсаткич ҳисобланади.

Қўмита йиғилишлари якунига кўра, пруденциал норматив талабларига риоя этмаганлиги ва ўз фаолиятини қонунчилик ҳужжатларида белгиланган тартибда мувофиқлаштирмаганлиги сабабли ўн еттита тижорат банкига нисбатан тегишли чора ва санкциялар қўлланилиши тўғрисида қатъий огоҳлантириш берилди.