Марказий банк Амир Темур таваллудининг 690 йиллигига бағишлаб олтин ва кумуш эсдалик тангаларни сотувга чиқармоқда.

Тангаларнинг оғирлиги 31,1 грамм бўлиб, соф олтин ва кумушдан (асиллик даражаси: 999,9) қуйилган.

Мазкур эсдалик тангалари уларнинг техник хусусиятларини тасдиқловчи асиллик сертификатлари билан сотувга чиқарилади.

Олтин ва кумуш тангаларнинг олд тарафида Амир Темурнинг портрети, Тошкент ва Самарқанд шаҳарларидаги Соҳибқирон ҳайкаллари ҳамда Оқсарой ва Амир Темур мақбараси тасвири акс этган.

Эсдалик тангалар ҳошияларига "AMIR TEMUR TAVALLUDINING 690 YILLIGI" сўзлари ҳамда Соҳибқирон яшаган йиллари — 1336-1405 йиллар ёзилган.

Олд тарафида Тошкент ва Самарқанддаги ҳайкаллар акс этган тангаларнинг орқа томонида Ўзбекистон Республикаси герби ва танганинг номинал қиймати — 100 000 сўм тасвирлаган. Танга ҳошияларига "O'ZBEKISTON RESPUBLIKASI MARKAZIY BANKI" ёзуви битилиб, пастки тарафида тангалар зарб қилина бошланган йил, 2026 йил ёзилган. 2026 ёзувининг чап тарафида олтин (AU) ёки кумушни (AG) ифодаловчи ҳарфий бирикламалар, ўнг тарафида эса унинг оғирлиги, 31,1 грамм тасвирланган.

Олд тарафида Соҳибқирон портрети, Оқсарой, Амир Темур мақбараси тасвирланган тангаларнинг орқа томонида эса Темур тузукларидан ҳикматлар келтирилган. Бу тангаларнинг ҳам ҳошияларига "O'ZBEKISTON RESPUBLIKASI MARKAZIY BANKI" ёзуви битилиб, пастки томонида Амир Темур байроғидаги уч ҳалқа акс эттирилган.

Муомалага чиқарилаётган тангаларнинг сони ва қачондан сотувга чиқарилиши ҳозирча маълум эмас.