Бугунги кунда глобал молия бозорида рақамли технологиялар ва сунъий интеллект нафақат операцион самарадорликни ошириш, балки соҳа тараққиётининг асосий драйверига айланиб улгурди. Мазкур йўналишдаги замонавий трендларни ўз фаолиятига татбиқ этиш мақсадида Агробанк тизимида янги анъана йўлга қўйилди. Эндиликда банкда ҳар ҳафтанинг чоршанба куни «Сунъий интеллект куни» сифатида белгиланиб, бу борада ходимларнинг билим ва кўникмаларини тизимли равишда ошириб боришга алоҳида эътибор қаратилмоқда.

^{Фото: Агробанк}

Ушбу ташаббус доирасида банк соҳасида сунъий интеллект технологияларининг ўрни ва истиқболларига бағишланган кенг кўламли ўқув-амалий тадбири ташкил этилди. Анжуман давомида соҳа мутахассислари томонидан сунъий интеллектнинг банк тизимидаги қўлланиш йўналишлари, мижозларга хизмат кўрсатиш сифатини оширишдаги амалий имкониятлари ҳамда келажакдаги технологик истиқболлари ҳақида батафсил маълумот берилди.

^{Фото: Агробанк}

Тадбирга нафақат банкнинг бош офиси, балки ҳудудий бошқармалар ва филиаллар ходимлари ҳам фаол жалб этилиб, мавзу юзасидан ўзларини қизиқтирган саволларга жавоб олишди.

^{Фото: Агробанк}

Мазкур амалий мулоқотга Рақамли иқтисодиёт ва агротехнологиялар университетининг ахборот технологиялари бўйича фан доктори (Doctor of Science), сунъий интеллект муҳандиси маърузачи сифатида таклиф этилди. Эксперт томонидан илғор алгоритмларнинг банк маҳсулотларини оптималлаштириш ва хавф-хатарларни бошқаришдаги роли илмий ва амалий жиҳатдан асослаб берилди.

^{Фото: Агробанк}

Банк томонидан амалга оширилаётган бу каби тизимли ишлар банкнинг рақамли трансформация йўлидаги изчил қадамларидан бири бўлиб, молиявий хизматлар бозорида технологик етакчиликни таъминлашга хизмат қилади. Сунъий интеллект технологияларини банк экотизимига интеграция қилиш орқали нафақат ички жараёнлар соддалаштирилади, балки мижозлар учун индивидуал ва қулай банк маҳсулотларини яратиш имконияти ҳам кенгаяди.