"Микрокредитбанк" АТБ UNA MOLIYA микромолия ташкилоти ҳамда MKB FAKTORING TASHKILOTI'ни аффилланган шахслар рўйхатига қўшди.

UNA MOLIYA ММТ 2024 йил 28 июнда ташкил этилган. 2025 йил 27 ноябрда қайтадан рўйхатдан ўтган. Компания Тошкент шаҳар Олмазор тумани Тараққиёт МФЙ Қорасарой кўчаси 315а-уй бўйича рўйхатдан ўтган. Раҳбари Тарасау Андрей ҳисобланади. Устав капитали 61,1 млрд сўмдан иборат.

UNA MOLIYA ММТга Robocash PTE. LTD (60%) ҳамда Микрокредитбанк (40%) эгалик қилади. Сингапурда рўйхатдан ўтказилган Robocash PTE. LTD UnaFinancial гуруҳининг бир қисми бўлиб, 2024 йил 21 май куни Микрокредитбанк янги микромолия ташкилотини яратиш учун ушбу компания билан ҳамкорлик бўйича келишув имзолаган эди.

Микромолия ташкилоти 2026 йил 1 январь ҳолатига кўра, 15,4 млрд сўмлик кредит портфелига эга.

"MKB FAKTORING TASHKILOTI" МЧЖ 2025 йил 2 сентябрда давлат рўйхатидан ўтказилган. Раҳбари Султонов Абдусамат Абдисатторович ҳисобланади. Юридик манзили Тошкент шаҳар Миробод тумани Шароф Рашидов МФЙ Амир Темур шоҳ кўчаси 4-уй (Микрокредитбанк бош офиси). Факторинг ташкилоти тўлиқ Микрокредитбанк эгалигида ташкил қилинган. Устав капитали 2 млрд сўмдан иборат.