8 март – Халқаро хотин-қизлар байрами якшанба кунига тўғри келиши муносабати билан байрам учун дам олиш куни душанба 9 март санасига кўчирилди. Бу ҳақда Президент Фармонида белгиланган.

Байрам кунининг кўчирилиши сабабли 5 кунлик иш ҳафтасида ишлайдиганлар, жумладан, банк ходимлари ушбу ҳафта кетма-кет 3 кун дам олади.

• 7 март – шанба, одатий дам олиш куни;
• 8 март – якшанба, одатий дам олиш куни;
• 9 март – душанба, кўчирилган байрам куни.

Шунингдек, Фармонда Байрам (ишланмайдиган) кунларининг узайтирилишини ҳисобга олган ҳолда республика аҳолисининг мароқли дам олиши учун керакли чораларни кўриш белгиланган.

Туризм қўмитаси ва Маданий мерос агентлигига туризм намойиши объектлари (маданий мерос объектлари, музейлар) ва меҳмонхона хизматлари учун чегирмалар берилиши ҳамда акциялар ўтказишни ташкил этиш топширилган.

Шунингдек, Ўзбекистон касаба уюшмалари федерациясига Соғлиқни сақлаш вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда санаторийлар ва соғломлаштириш муассасалари учун чегирмалар бериш ҳамда акциялар ўтказиш, “Uzbekistan Airways” АЖ ва “Ўзбекистон темир йўллари” АЖга ички транспорт қатновлари учун чегирмалар бериш ва акциялар ўтказиш тавсия этилган.