JP Morgan Bank International'нинг Россия ва МДҲ давлатлари бўйича президенти Ян Леонидович Тавровский Агробанк АТБ Кузатув кенгашининг мустақил аъзоси этиб сайланди. Бу ҳақда Корпоратив ахборот ягона порталида маълумот берилди.

Хабарда келтирилишича, жорий йилнинг 15 февраль куни Агробанк акциядорларининг навбатдан ташқари умумий йиғилиши бўлиб ўтган. Унда Тавровский Ян Леонидович номзодини банк Кузатув кенгаши аъзолигига мустақил аъзо сифатида сайлаш таклиф этилган ва акциядорлар томонидан 100 фоизлик овоз билан маъқулланган.

Тавровский Ян Леонидович банк Кузатув кенгаши мустақил аъзоси сифатида уч йил муддатга сайланади ва унинг номзоди Марказий банк билан келишилгандан сўнг Кузатув кенгаши аъзоси вазифасини бажаришга киришади.

Ян Тавровский ҳақида

Ян Леонидович Тавровский 1970 йил 21 январда туғилган. 1992 йилда Москва алоқа институтини "Радиоалоқа, радиоэшиттириш ва телевидение" мутахассислиги бўйича тамомлаган. 1994 йилда Россия Марказий банкининг Москва банк мактабини "Банкларда бухгалтерия ҳисоби" мутахассислиги бўйича тугатган.

1998 йилда MBA бўйича Лондон бизнес мактаби дипломини олган. Айнан шу йилдан Лондонда, дастлаб Goldman Sachs International кредит ва рейтинг бўйича маслаҳат гуруҳида, кейин эса JP Morgan Securities Ltd кредит молиялаштириш гуруҳида ишлаган.

2004 йилда Россиянинг JPMorgan Bank корпоратив мижозлар ва капитал бозорлари департаменти раҳбари этиб тайинланган.

2009 йил апрель ойида Morgan Stanley Bank бошқарув раисининг ўринбосари ва Россия ва МДҲ бўйича инвестиция ва банк амалиёти раҳбари этиб тайинланди.

2010 йил март ойида у JP Morgan'га Россия ва Украина бўйича инвестиция банки раҳбари ва банкнинг Россия бўлими бош бошқарув директори ўринбосари сифатида ўтган. 2012 йил апрель ойида у Россия ва МДҲда JP Morgan президенти лавозимини эгаллаган.