2025 йил якунлари бўйича банк сектори капитализация ҳажми ҳамда акциядорлар сони бўйича Ўзбекистон капитал бозорининг энг оммавий сегменти бўлиб қолмоқда.

Марказий депозитарий маълумотларига кўра, мамлакатдаги 38 та банк томонидан чиқарилган акцияларнинг умумий ҳажми 95,9 трлн сўмдан ошган.

Фото: Марказий депозитарий

Акциядорлар сонининг юқорилиги банклар фаолиятининг кенг кўламли эканинигина эмас, балки аҳоли ва бизнеснинг молиявий институтларга бўлган ишончи ошиб бораётганини ҳам кўрсатади.

Барча акциядорларнинг (234,5 минг) қарийб 75 фоизи (қарийб 174,1 минг нафари) жисмоний шахслардан иборат. "Бу фуқароларнинг қимматли қоғозлар бозорида инвестиция қилишга бўлган фаол қизиқишини тасдиқлайди", дейилади хабарда.

Акциядорлар сони бўйича анъанавий равишда Агробанк етакчи бўлиб қолмоқда, унинг реестрида 92 789 нафар инвестор рўйхатдан ўтган.

Етакчи учликдан, шунингдек, 40 145 нафар акциядори билан Ўзсаноатқурилишбанк ҳамда 34 603 нафар акциядорига эга Микрокредитбанк ўрин олган.

Шунингдек, Ипотека-банк (22 003) ва Туронбанк (10 715) ҳам катта акциядорлик таркиби билан ажралиб турибди.