Ўзбекистон Республикаси Марказий банкида янги тайинловлар амалга оширилди. Бу ҳақда Марказий банкнинг расмий телеграм саҳифасида маълум қилинди.

Хусусан, шу кунга қадар Монетар операциялар департаменти директори лавозимида ишлаб келган Нодирбек Муҳаммадиевич Ачилов Марказий банк Раиси ўринбосари этиб тайинланди.

Шунингдек, Кредит ташкилотлари фаолиятини тартибга солиш методологияси департаментига раҳбарлик қилиб келган Санжар Салайдинович Носиров ҳам Марказий банк Раиси ўринбосари этиб тайинланган.

Марказий банк раисининг яна бир ўринбосари лавозимига Нусратулла Нигматуллаевич Фазилов тайинланган . Мазкур лавозимга тайинлангунга қадар Н. Фазилов Банкларнинг пруденциал назорати департаментига раҳбарлик қилган.

Марказий банк расмий сайтидаги маълумотларга кўра, бугунги кунда банк раисининг битта ўринбосари "вакант" сифатида кўрсатилган. Янги тайинловлар амалдаги раис ўринбосарларининг айримларини лавозимидан озод қилиш эвазига бўлганми ёки йўқ, ҳозирча маълумот берилмаган.