Марказий банк маълумотларига кўра, Ўзбекистон тижорат банклари 2025 йилнинг январь —сентябрь ойларида жами 10,9 трлн сўм соф фойда олди. Бу кўрсаткич ўтган йилнинг шу даврига нисбатан 2,79 трлн сўмга (+34,5%) кўпдир.

Bankers.uz оператив маълумотларга таяниб, ҳар бир тижорат банкининг соф фойдаси қанча бўлганлигини таҳлил қилди.

Ўтган 9 ойлик натижаларига кўра, 4 та тижорат банки — Ўзмиллийбанк (1 трлн 449,7 млрд сўм), Ўзсаноатқурилишбанк (1 трлн 386 млрд сўм), Hamkorbank (1 трлн 267,8 млрд сўм) ҳамда Капиталбанк (1 трлн 156,6 млрд сўм)лар соф фойдасини 1 трлн сўмдан оширишга эришганлар.

Шунингдек, етакчи "ўнлик"дан Ориент Финанс банк (793,5 млрд сўм), Ипак Йўли банки (+752,5 млрд сўм), Трастбанк (+616,9 млрд сўм), KDB Bank Ўзбекистон (493,2 млрд сўм), Давр банк (+465,1 млрд сўм) ҳамда ўтган йил мос даврида зарарда бўлган Бизнесни ривожлантириш банки ўрин олган.

Энг юқори соф фойда қайд этган 10 та банк жами банк тизими соф фойдасининг қарийб 72 фоизини берган.

^{Инфографика: Муҳаммаджон Мамажонов / Bankers.uz}

Соф фойда кўрсаткичи Ўзсаноатқурилишбанк, Hamkorbank, Капиталбанк, Даврбанк, Алоқабанк, ANORBANK ва Ориент Финанс банкларда нисбатан сезиларли ўсганини ҳам қайд этиш мумкин.

Шунингдек, TBC Bank Uzbekistan (-244,1 млрд сўмга), Ипотека банк (-86,8 млрд сўмга), Зираат банк (-11,3 млрд сўмга) ҳамда Туронбанк (-13,1 млрд сўм)ларда соф фойда ўтган йил мос даврига нисбатан камайиш қайд этганини кўриш мумкин.

Иккита банк — фаолиятини нисбатан яқинда бошлаган Янги банк (-95,4 млрд сўм) ва Apex Bank (-52,2 млрд сўм) 9 ойликни молиявий зарарда якунлаган.

Ўтган йил мос даврида 83,4 млрд сўм зарарда бўлган AVO банк бу йил 9 ойликда соф фойдага чиққанини ҳам алоҳида қайд этиш мумкин.