Марказий банк тижорат банкларининг кредит портфели миқдори ҳамда муаммоли кредитлар миқдори ҳамда улуши тўғрисида 2025 йилнинг 9 ойлик якунлари бўйича маълумотларни тақдим қилди.

2025 йил 1 октябрь ҳолатига банкларнинг жами кредит портфели йил бошига нисбатан 49 трлн сўмга ўсиб, 582,2 трлн сўмни ташкил қилган. Портфель давлат банкларида 28,2 трлн сўмга, бошқа банкларда 20,9 трлн сўмга ўсган.

Кредит портфели йил бошига нисбатан фақат Ўзмиллийбанкда камайгани (-3,2 трлн сўм) инобатга олмаса давлат банкларининг деярли барчасида ўсиш қайд этган. Бошқа банклардан Ипотека банк (-113 млрд сўм), Тенге банк (-429 млрд сўм), Азия Альянс банк (-119,2 млрд сўм), Узум банк (-63,8 млрд сўм)ларда кредит қўйилмалари қолдиғи камайган.

Портфелнинг йил бошига нисбатан жадал ўсиши давлат банкларидан Агробанк (+17,6 трлн сўм), Алоқабанк (+4,0 трлн сўм), Микрокредитбанк (+2,6 трлн сўм)ларда, бошқа банклардан TBC банк (+3,4 трлн сўм), Капиталбанк ва Ҳамкорбанк (+3,1 трлн сўмдан), Ҳаёт банк (+2,3 трлн сўм), Анорбанк (+2,2 трлн сўм)ларда рўй берган.

^{Манба: Марказий банк}

Банклардаги муаммоли кредитлар миқдори йил бошига нисбатан 76 млрд сўмга кўпайган ва 21,2 трлн сўмни ташкил қилмоқда.

Банклар кесимида Ипотека банк (-1,4 трлн сўм), Бизнесни ривожлантириш банки (-504,2 млрд сўм), Агробанк (-315,2 млрд сўм), Халқ банки (--117,0 млрд сўм) муаммоли кредитларни нисбатан камайтиришга эришганлар.

Ўзсаноатқурилишбанк (+443 млрд сўм), TBC банк (+328 млрд сўм), Анор банк (+228 млрд сўм), Ўзмиллийбанк (+217 млрд сўм), Давр банк (+216 млрд сўм)ларда муаммоли кредитлар йил бошига нисбатан сезиларли миқдорда кўпайган.