Марказий банк 2025 йилнинг 9 ойи давомида ажратилган ипотека кредитлари бўйича маълумотни эълон қилди. Унга кўра, ўтган давр мобайнида 50,1 минг нафар фуқарога 15 трлн 67 млрд сўм миқдорида ипотека кредитлари ажратилган. Бу 2024 йилнинг мос даврига нисбатан 3,3 трлн сўмга ёки 28,4 фоизга кўпдир.

Ўтган 9 ойда берилган ипотека кредитларининг энг катта қисмини Иқтисодиёт ва молия вазирлиги шартлари асосидаги кредитлар (7,4 трлн сўм) ташкил қилмоқда. Шунингдек, банклар ўз маблағлари ҳисобидан берилган ипотека кредитлари салмоғи ҳам ошган - 6,1 трлн сўм. Ипотекани қайта молиялаштириш компанияси ресурслари ҳисобидан эса 1,5 трлн сўм миқдорида кредитларни ажратилган.

Маълумот учун: берилган ипотека кредитлари ҳажмида Ипотекани қайта молиялаштириш компанияси улуши 2025 йил 9 ойида 10,01 фоизни, 2024 йил мос даврида 10,7 фоизни, 2023 йил 9 ойида эса 10,9 фоизни ташкил этган.

Ҳудудлар кесимида энг кўп ипотека кредитлари одатдагидек Тошкент шаҳри (4 трлн 816,5 млрд сўм), Фарғона (1 трлн 141,7 млрд сўм) ва Андижон (1 трлн 137,3 млрд сўм) вилоятлари ҳиссасига тўғри келмоқда.

Ипотека кредитларининг катта қисми — 74 фоизи бирламчи уй-жой бозори учун, 26 фоизи иккиламчи бозордаги уйларга йўналтирилган.

Эътиборлиси, ипотека кредити олганлар орасида хотин-қизлар улуши ортиб бормоқда. Бу йилнинг ўтган 3 чорагида ипотека кредити олган 50,1 нафар фуқаронинг қарийб 20,3 минг нафари (40 фоизини) аёллар ташкил қилди. Ипотека кредитидан фойдаланган хотин-қизлар улуши 2024 йилда 37 фоизни, 2023 йилда 36 фоизни ташкил этган эди.

Шунингдек, ажратилган ипотека кредитларининг ўртача фоиз ставкаси кўтарилган. Янги тартиб доирасидаги ипотека кредитлари ўртача ставкаси сентабрда 17 фоиздан 17,1 фоизга, банкларнинг ўз маблағлари ҳисобидан ажратган ипотекалари ставкаси 22,7 фоиздан 22,8 фоизга кўтарилган.

Аҳолига ажратилган ипотека кредитлари қолдиғи бугунги кунга келиб 2021 йилга нисбатан 2,7 баробарга ўсди ва 76 трлн сўмга етди.

^{Инфографика: Марказий банк}