"Асакабанк" АЖ Тошкент шаҳри, Миробод тумани, Нукус кўчаси 67-уй манзилида (Миробод бозори қаршисида) жойлашган ўзининг собиқ бош офиси биносини электрон аукцион орқали савдога чиқарди. Объектни сотиш ҳақида Банк Кузатув Кенгашининг 2025 йил 11 сентябрдаги қарори билан рухсат берилган.

^{Фото: e-auksion.uz}

E-auksion платформасида жойлаштирилган лотнинг бошланғич нархи 99,807 миллиард сўм (ҚҚС билан) этиб белгиланган. Тўлов шартларига кўра, харидор бошланғич сумманинг 30%ини олдиндан, қолганини эса 7 ой мобайнида бўлиб-бўлиб тўлаши мумкин. Аукцион ошириб бориш шаклида бўлиб ўтади.

^{Фото: e-auksion.uz}

Объект 1997 йилнинг 27 май куни фойдаланишга топширилган ва асосан бетон конструкцияларда барпо этилган.

Сотувга қўйилган бинолар комплекси қарийб ярим гектар (0,4965 га) ер майдонида жойлашган бўлиб, биноларнинг умумий майдони 7 395 квадрат метрни ташкил этади. Шундан 5 442,69 квадрат метри фойдали майдон сифатида қайд этилган.

Бинонинг асосий қисми 8 қаватдан иборат бўлиб, унга ертўла, ёрдамчи бинолар, омборхона, қоровулхона, трансформатор хоналари ва бошқа хизмат иншоотлари ҳам киритилган. Кадастр ҳужжатига кўра, объект 2023 йил 21 августда расмийлаштирилган ва захираланган мулк сифатида рўйхатга олинган.

^{Фото: e-auksion.uz}

Иншоот электр, сув, канализация, иссиқлик ва газ таъминоти билан таъминланган. Шу билан бирга, ерда ноқонуний қурилмалар, сервитут ёки темир йўл тармоғи каби чекловчи омиллар мавжуд эмас.

^{Фото: e-auksion.uz}

Аукцион ғолибидан ҚҚС солиқлари тўланиши талаб қилинади. Агар харидор белгиланган муддатларда тўловни амалга оширмаса, аукцион натижалари бекор қилиниши мумкин. Шунингдек, объект Тошкент шаҳар ҳокимлигининг 2022 йил 11 февралдаги қарорларига асосан реконструкция қилиш ва янги қурилишлар учун мўлжалланган ҳудудда жойлашгани қайд этилган.

Қўшимча маълумотларни +998339555646, ҳамда +998781476565, ички 18-49, 12-29, 18-68 рақамларидан олиш мумкин.