Pixelcraft компанияси ўз мижозлари учун қўшимча воситаларни ишлаб чиқишни давом эттирмоқда. Бу галги янгиланишлар "AloqaBank"нинг корпоратив веб-сайтига оид. Мижозларга хизмат кўрсатиш қулайлигини ошириш мақсадида банк веб-сайтида янги имконият — электрон навбатни онлайн банд қилиш хизмати жорий этилди. Энди сайт фойдаланувчилари банк бўлимига ташриф буюришни олдиндан режалаштириш, ўзларига қулай вақтни танлаш ва кутиш вақтини камайтиришлари мумкин бўлади.

Онлайн банд қилиш тизими содда ва тушунарли тарзда ишлайди. Навбатни банд қилиш учун сайтнинг тегишли бўлимига кириб, қисқа рўйхатдан ўтиш, керакли хизматни, банк бўлимини, ташриф санаси ва вақтини танлаш кифоя. Тасдиқлангандан сўнг, фойдаланувчи банкка ташриф буюрганда ўз-ўзига хизмат кўрсатиш терминалига киритиши лозим бўлган фаоллаштириш кодини олади. Натижада терминал танланган хизматга мос келувчи талонни чоп этиб беради.

^{Фото: AloqaBank}

Таъкидлаш жоизки, электрон навбат хизматини жорий этиш бир қатор афзалликларга эга: мижозларнинг вақтини тежаш, банк бўлимларига юкламани камайтириш, хизмат кўрсатиш сифатини ошириш ва ходимлар ишини соддалаштириш. Ушбу қадам банкнинг рақамли трансформация стратегиясининг бир қисми бўлиб, янада қулай, замонавий ва мижозларга йўналтирилган шароитларни яратишга қаратилган.

Бундан ташқари, сайтда "Менинг бандловларим" деб номланган қўшимча имконият мавжуд бўлиб, у орқали фойдаланувчи ўзининг барча ёзувлари тарихини кўриши ва банкка ҳар бир ташрифи ҳақида батафсил маълумот олиши мумкин. Шунингдек, "Бандлов архиви" номли махсус маъмурий модуль ишлаб чиқилган бўлиб, унда барча расмийлаштирилган аризалар маълумотлари марказлаштирилган ҳолда сақланади. Бу мижозлар оқимини самарали бошқариш ва тизим ишлашининг шаффофлигини ошириш имконини беради.

Эслатиб ўтамизки, банк сайти Pixelcraft компанияси томонидан ишлаб чиқилган ва 2023 йил апрель ойида ишга туширилган.

Ҳамкорлик асосида