Таълим кредити олий ва профессионал таълим ташкилотларида таҳсил олиш учун фақат кундузги таълим шаклида ўқиётган талаба ва ўқувчиларга ажратилади. Кредит йиллик ставкаси Марказий банк асосий ставкаси даражасида (айни дамда 14 фоиз) бегиланган.

Агар Марказий банкнинг асосий ставкаси пасайса, кредитлаш ставкаси мутаносиб равишда пасаяди, агар у ошса, ўзгаришсиз қолади. Таълим кредити талаба ўқишни тугатгандан сўнг еттинчи ойдан бошлаб, 7 йил муддатга берилади.

Биринчи босқич талабалари учун тўлов-контракт суммаси миқдорида, иккинчи ва ундан юқори курс талабалари учун фанларни ўзлаштиришнинг ўртача кўрсаткичи “3” дан паст бўлган тақдирда тўлов-контракт суммасининг кўпи билан 80 фоизи миқдорида ажратилиши белгиланган. Бунда кредит тўлов-контракт суммасининг дастлабки 20 фоизи талаба томонидан тўлангандан кейин ажратилади.

Хотин-қизларга ажратиладиган таълим кредитининг фоиз тўловлари Ўзбекистон Республикаси Иқтисодиёт ва молия вазирлиги ҳузуридаги Таълим кредитини молиялаштириш жамғармаси маблағлари ҳисобидан тўлиқ қоплаб берилади. “Ижтимоий ҳимоя ягона реестри”га кирган оилаларнинг хотин-қизларига ажратиладиган таълим кредити бўйича гаров ва кафиллик талаб этилмайди.

Тижорат банки кредит олувчи томонидан таълим кредити беришни сўраб тақдим қилинган ариза ва унга илова қилинган ҳужжатларни беш иш куни мобайнида кўриб чиқиб, таълим кредити шартномасини имзолайди.

Кредит олиш учун қуйидаги ҳужжатлар талаб этилади:

• Ариза;

• Шахсни тасдиқловчи ҳужжат;

• Олий таълим муассасаси билан тузилган шартнома нусхаси;

• Кафил ва биргаликда қарз олувчиларнинг паспортлари ва кредит сиёсатида кўрсатилган ҳужжатларнинг нусхалари.

Биргаликда қарз олувчилар: таълим кредитини расмийлаштиришда ва унинг қайтарилишида талабанинг доимий даромад манбаига эга бўлган оила азолари ёки учинчи шахслар биргаликда қарз олувчи сифатида қатнашиши мумкин.

Таълим кредити расмийлаштириш учун аризаларни банк офисларида, my.gov.uz ва Talim-krediti.mf.uz портали орқали қолдириш мумкин.Таълим кредити қуйидаги банкларда келтирилган муддатлар асосида (имтиёзли давр қўшилган ҳолда) ажратилади:

• Агробанк (7.5 йил), алоқа маркази рақами - 1216;

• Асакабанк (7.5 йил), алоқа маркази рақами - 1152;

• Алоқабанк (7.5 йил), алоқа маркази рақами - 71 2307777;

• Микрокредитбанк (15 йил), алоқа маркази рақами - 1285;

• Халқ банки (7.5 йил), алоқа маркази рақами - 1106;

• Ўзсаноатқурилишбанк (11.5 йил), алоқа маркази рақами - 1180;

• Ўзмиллийбанк (14 йил), алоқа маркази рақами - 1344;

• Ҳамкорбанк (7.5 йил), алоқа маркази рақами - 1256;

• Бизнесни ривожлантириш банки (7.5 йил), алоқа маркази рақами - 1254;

• Туронбанк (7.5 йил), алоқа маркази рақами - 1220;

• Ориент Финанс банк (7.5 йил), алоқа маркази рақами - 4004;

Эслатиб ўтамиз, кредит бўйича фоизлар талабанинг ўқиш даврида тўлаб борилади. Кредит бўйича асосий қарзни тўлаш шартлари бузилган тақдирда муддати ўтган қарздорлик миқдори бўйича фоиз ставкаси ушбу муддати ўтган қарздорлик пайдо бўлган кундан бошлаб 1,5 баробарга ошади. Кечиктирилган ҳар бир кун учун қарздорлик суммасининг 0,1% миқдорида фоизлар ундирилади. Шунинг учун фоизларни вақтида тўлаб боришни маслаҳат берамиз.