Ўзбекистон ҳукумати 2025 йил охиригача Давлат улуши мавжуд банклар — Ўзсаноатқурилишбанк, Асакабанк, Алоқабанк ва Туронбанкни хусусийлаштиришни якунлашни режалаштирмаяпти. Бу ҳақда Иқтисодиёт ва молия вазирлиги томонидан эълон қилинган 2026-2028 йилларга мўлжалланган фискал стратегияда маълум қилинди.

Стратегияда келтирилишича, мазкур банкларни ХМИ кўмагида босқичма-босқич хусусийлаштириш, биринчи биринчи босқичда институционал ўзгаришлар (фаолиятини трансформация қилиш) иккинчи босқичда давлат акция пакетларини сотиш режалаштирилган.

"Ўзсаноатқурилишбанк"ни хусусийлаштириш 2025-2026 йилларда, қолган учта банкни сотиш эса 2026-2027 йилларда якунланиши режалаштирилган.

Шунингдек, банк тизимини ислоҳ қилиш даврида аҳолининг молиявий хизматларга бўлган талабини қондириш, инвестиция лойиҳаларини қўллаб-қувватлаш механизмини кенг жорий қилиш, банк хизматларининг ҳудудий қамровини таъминлаш мақсадида Ўзмиллийбанк, Агробанк, Халқ банки, Микрокредитбанк ва Бизнесни ривожлантириш банки устав капиталларидаги давлат улушини сақлаб қолиш мақсад қилинган.

Давлат банкларини хусусийлаштириш

2019 йилнинг апрель ойида президент Ўзсаноатқурилишбанк акциялари пакетини бирламчи (IPO) ва Алоқабанкникини иккиламчи (SPО) таклифга қўйиш тўғрисида қарор қабул қилди. Бир йил ўтиб, 2020 йилда давлат раҳбари ЕТТБ ва бошқа халқаро ташкилотларни жалб қилган ҳолда 6 та банкдаги давлат улушларини босқичма-босқич сотиш режасини тасдиқлади.

2022 йилда тасдиқланган хусусийлаштириш дастурида Халқаро молия корпорацияси, Европа тикланиш ва тараққиёт банки ҳамда Осиё тараққиёт банкини жалб қилган ҳолда йил охирига қадар “Ўзсаноатқурилишбанк” АТБ ва “Асакабанк” АТБнинг давлат улушлари савдога чиқарилиши белгиланди.

Шунингдек, 2023 йил 1 июлга қадар АТ “Халқ банки”, “Микрокредитбанк” АТБ, АТ “Алоқабанк”, “Агро банк” АТБ, “Ўзмиллийбанк” АЖларнинг акцияларини фонд биржаси орқали оммавий жойлаштириш (IPO) ишларини ташкиллаштириш вазифаси қўйилди.

Бироқ, 2023 йил август ойида улушларни сотиш муддати 2024 йил охирига кўчирилди, кейин эса 2025 йил охиригача узайтирилди.

Fitch Ratings агентлигининг банк сектори бўйича директори Павел Каптел аввал хусусийлаштирилиши режалаштирилган учта давлат банкини 2025 йилда ҳам сотиш анча қийин бўлишини айтган эди. Fitch вакили ҳукумат, Марказий банк ва давлат банклари инвесторлар билан битим тузиш учун олдиндан тайёргарлик ишларини амалга ошираётганини маълум қилган.