Марказий банк 2025 йилнинг 6 ойи давомида аҳолига ажратилаётган ипотека кредитлари статистикасини тақдим қилди. Маълумот ва таҳлилларга кўра, ўтган ярим йилликда ипотека кредитлари ажратиш суръати ўса бошлаган.

Хусусан, 2025 йилнинг ўтган даврида эса 31 589 нафар фуқарога 9 436,5 млрд сўм миқдорида ипотека кредитлари ажратилган (2024 йил мос даврида жами 26 201 нафар фуқарога 6 883,9 млрд сўм кредитлар ажратилганди).

Бу мазкур давр оралиғида кредит олган фуқаролар сонининг 5 388 тага (ёки 20,6%га) ва ажратилган кредит ҳажмининг эса 2 552,6 млрд сўмга (ёки 37%га) ошишини билдиради.

^{Инфографика: Марказий банк}

Шунингдек, ажратилган битта ипотека кредитининг ўртача қиймати 298,7 млн.сўмга етган (солиштириш учун ўтган йилнинг мос даврида 262,7 млн.сўм эди).

Ажратилган кредитларнинг ҳудудлар бўйича тақсимотида Тошкент шаҳри етакчилик қилмоқда. Пойтахтда ажратилган ипотека кредитлари ҳажми ҳам ўтган йил мос давридаги 2,0 трлн сўмдан бу йил қарийб 3,0 трлн сўмлик кўрсаткичгача кўтарилган.

Ипотека кредитларини молиялаштириш манбалари орасида Иқтисодиёт ва молия вазирлиги шартлари асосидаги кредитлар энг катта улушга эга бўлиб турибди - 67,7 фоиз ёки 6 389,3 млрд сўм.

Гендер бўйича тақсимотда ҳам ўзгариш мавжуд: 2024 йил биринчи ярим йилликда ипотека олувчиларнинг 35 фоизини хотин-қизлар ташкил қилган бўлса, 2025-йилда бу кўрсаткич 39 фоизга етган.

Кредит олувчиларнинг ёш бўйича таркибида ҳам тенденция кузатилади. 2024 йил мос даврида кредит олувчиларнинг 70 фоизи 31-50 ёш орасидаги фуқаролардан иборат бўлган бўлса, 2025-йилда ушбу ёш гуруҳи улуши 66 фоизга камайган. Бунинг ҳисобига, ёш (18-30 ёшгача) гуруҳининг улуши 20 фоиздан 25 фоизга кўтарилган.

Бирламчи ва иккиламчи бозордаги уйлар учун ажратилган кредитларда ҳам ўзгариш мавжуд. 2024 йил ярим йилликда бирламчи бозордаги уйлар учун ажратилган кредитлар улуши 61 фоизни, 2025 йил ўтган даврида эса бу кўрсаткич 75 фоизни ташкил қилган. Бу эса янги қурилган уй-жойларга талаб ошиб бораётганидан далолат беради.