Капиталбанк Тошкентдаги "Ёшлик" спорт-иқтисодий мажмуасини давлатдан сотиб олди. Бу ҳақда Давлат активларини бошқариш агентлиги хабар берди. Банк бу объект учун 297,9 миллиард сўм (тахминан 23 миллион доллар) таклиф қилиб, хусусийлаштириш бўйича танлов (аукцион)да ғолиб чиққан. Харидор мазкур маблағни бир ой ичида давлат бюджетига ўтказилиши шарт.

Шартнома бўйича, Капиталбанк спорт мажмуасининг фаолиятини камида 10 йил давомида сақлаб қолиш мажбуриятини олган ва ушбу ҳудудда янги қурилиш ишларини амалга оширишга рухсат берилмайди.

Ҳодисалар хронологияси

"Ёшлик" спорт мажмуаси аввалроқ Ташқи иқтисодий фаолият Миллий банки (Ўзмиллийбанк)га тегишли эди. 2024 йил июнь ойида Ўзмиллийбанк таркибидаги "NBU Invest Group" акциядорлик жамиятининг қарорига кўра, спорт мажмуасини бошқарувчи "Invest Group Centre" компаниясининг 100 фоиз акциялари Давлат активларини бошқариш агентлигига ўтказилган. Бу жараёнда объектнинг баланс қиймати 4,11 миллиард сўм деб баҳоланган.

Агентлик 2024 йил октябрида "Ёшлик" спорт мажмуасини хусусийлаштириш учун сотувга чиқарганди. Ўша пайтдаги хабарда айтилишича, 2025 йил февраль ойига келиб, спорт мажмуасини сотиб олиш учун учта номзоднинг аризалари қабул қилинган.

"Ёшлик" спорт мажмуаси ҳақида

"Ёшлик" спорт мажмуаси Тошкент шаҳрининг Мирзо Улуғбек тумани, "Пушкин" метроси яқинида, Оққўрғон кўчасида жойлашган бўлиб, собиқ СССР даврида қурилган ва дастлаб "Старт" стадиони сифатида танилган. 1990-йиллар охири – 2000-йиллар бошларида Ўзмиллийбанк ташаббуси билан стадион қайта реконструкция қилинган ва "НБУ стадиони" деб номланган. 2000 йили ушбу майдонда Миллий банк қошида ташкил этилган НБУ-"Азия" футбол клуби машғулот ва мусобақалар ўтказган.

Кейинчалик спорт мажмуаси "Ёшлик" номини олган. Бугунги кунда мажмуа таркибида очиқ ҳаводаги катта сузиш ҳавзаси, футбол майдони ва енгил атлетика учун мўлжалланган стадион ҳамда бошқа спорт иншоотлари мавжуд. Асосий стадионнинг томошабинлар учун сиғими 15 минг кишини ташкил этади. У кўп йиллардан буён пойтахт аҳолиси ва спортчилар учун муҳим машғулот ва мусобақалар ўтказиладиган марказлардан бири ҳисобланади.

^{Видео: Feel Art Man / Youtube}