ЕТТБнинг Озарбайжон ва Тунисдаги офисларига ўзбек аёллари раҳбар этиб тайинланди

Фото-коллаж: Bankers.uz

Европа тикланиш ва тараққиёт банкининг Озарбайжон ва Тунисдаги офисларига ўзбекистонлик аёллар раҳбар этиб тайинланди. Бу ҳақда ЕТТБ матбуот хизмати хабар бермоқда.

Банк хабарига кўра, Ўзбекистон фуқароси Камола Махмудова Озарбайжонда ЕТТБнинг янги раҳбари сифатида фаолият олиб боради. У банкнинг Кавказ мамлакатидаги сармоялари ва операциялари учун жавобгар бўлади ва салафи Ивана Дуартенинг ўрнини эгаллайди. Камола Махмудова 2022 йилда Бокуга кўчиб ўтади.

«Мен банкнинг портфелидаги «яшил» лойиҳалар бўйича етакчи бўлиш имкониятига эга бўлган Озарбайжонда ЕТТБ фаолиятига раҳбарлик қилганимдан хурсандман. "Яшил ўтиш" - ҳар бир мамлакат учун катта муаммо ва биз Озарбайжонга унинг ҳаракатларида ёрдам бера оламиз. Бизнинг мақсадимиз-узоқ муддатли барқарор молиялаштиришни таъминлаш, хусусий сектор диққат марказимизда», - деди Маҳмудова.

У илгари ЕТТБнинг Савдони осонлаштириш дастурида етакчи банкир, директор ўринбосари бўлиб ишлаган. 2009 йилдан бери у банкнинг Яқин Шарқ, Шимолий Африка ва Кипрга томон кенгайишига раҳбарлик қилмоқда.

"У Халқаро Савдо Палатаси, Жаҳон Савдо Ташкилоти ва Халқаро Валюта Жамғармаси билан савдони молиялаштиришни ривожлантириш, корпоратив банк хизматларини тартибга солиш ва рақамлаштириш бўйича сиёсий мулоқотда муҳим роль ўйнади", - дейилади ЕТТБ хабарида.

Яна бир ўзбекистонлик Нодира Мансурова Европа тикланиш ва тараққиёт банкининг Тунисдаги офисига раҳбар этиб тайинланди. 1 сентябрдан бошлаб у ушбу лавозимда ишлаб келган Антуана Салле де Шуни алмаштирди ва банкнинг шимолий Африка мамлакатлари бўйича сармоялар ва операцияларига жавобгар бўлади.

"Мен жуда хурсандман ва бу вазифасини қабул қилиш ҳамда жанубий ва шарқий Ўртаер денгизи минтақаси (SEMED)га қайтишдан шараф туяман. ЕТТБнинг мамлакатдаги ютуқларига таяниб, мен Тунис ҳукумати, донорлар ҳамжамияти ва бошқа стратегик шериклар билан мамлакатнинг иқтисодий устуворликларини қўллаб-қувватлаш ва илгари суриш, хусусий секторни ривожлантириш, яшил инвестициялар, барқарор ва инклюзив ўсишга кўмаклашиш бўйича ишимизни давом эттиришга умид қиламан", - дея фикр билдирди Мансурова.

2001 йилда Нодира Мансурова ЕТТБнинг Ўрта Осиёдаги кичик ва ўрта бизнесни молиялаштириш ва ривожлантириш дастурининг минтақавий менежери бўлиб ишлаган.

Мансурова Тунисга маҳаллий кичик бизнес, шунингдек Ўртаер денгизида бизнес инфратузилмасини ривожлантириш учун бой тажриба олиб келади, деб қайд этади банк матбуот хизмати.