Жорий йилнинг 5 март куни Агробанк Кузатув кенгашининг навбатдан ташқари мажлиси бўлиб ўтди. Унда Агробанк бошқаруви раисининг биринчи ўринбосари Кахоров Эркин Азизжоновични мазкур банк Бошқаруви раиси этиб тайинлаш бўйича қарор қабул қилинди. Бу ҳақда Корпоратив ахборот ягона порталида маълумот келтирилган.

Маълум бўлишича, Ўзбекистон Республикаси Президенти Администрациясининг 2025 йил 4 мартдаги хатига асосан шу кунга қадар "Агробанк" АТБ Бошқаруви раиси лавозимида ишлаб келган Рустам Уктамович Маматкулов саломатлиги ёмонлашганлиги туфайли банк Бошқаруви раиси маслаҳатчиси лавозимига ўтказилган.

"Агробанк Бошқаруви раиси лавозимига кўп йиллардан буён самарали ишлаб келаётган Бошқарув раисининг биринчи ўринбосари Кахоров Эркин Азизжоновичга ушбу вазифани юклаш таклифи билдирилган", дейилади йиғилиш баённомасида.

Банк Кузатув кенгаши аъзоларининг 100 фоиз розилиги билан Эркин Кахоров "Агробанк" АТБ Бошқаруви раиси этиб тайинланди.

Маълумот учун, Э.Кахоров 1988 йилда Наманган вилоятида туғилган. 2009 йилда Наманган муҳандислик-иқтисодиёт институтини, 2017 йилда Ўзбекистон Республикаси Банк-молия академиясини тамомлаган. 2008 йилдан буён банк тизимида фаолият юритиб келади.