Йил бошидан AloqaVentures томонидан уч истиқболли стартапга инвестициялар киритилди. Ушбу лойиҳалар сунъий интеллект, логистика, рақамли бошқарув ва бизнесни автоматлаштириш соҳаларида фаолият юритиб, минтақа рақамли экотизимни ривожлантиришга хизмат қилади.

Unitlab.ai – сунъий интеллект асосидаги лойиҳаларни тезроқ, арзонроқ ва самарали амалга ошириш имконини берувчи платформа. Стартап $200 минг миқдорида инвестиция жалб қилиб, сунъий интеллект моделларини бошқариш ва маълумотларни белгилаш жараёнини автоматлаштиришга ихтисослашган.

Unitlab.ai платформаси:

• - маълумот белгилаш жараёнини 15 баробаргача тезлаштиради,
• - харажатларни 5 баробаргача камайтиради,
• - ML муҳандисларининг вақтини 60% гача тежайди.

AloqaVentures венчур фонди томонидан иккинчи инвестиция DATATRUCK (Fintruck) стартапига киритилди. АҚШда фаолият юритувчи Freight Tech SaaS платформаси $300 минг миқдорида Pre-Series A (bridge раунди) инвестициясини қабул қилди.

DATATRUCK – юк ташиш соҳасидаги молиявий ва операцион жараёнларни автоматлаштирувчи илғор тизим. Компаниянинг TruckGPT сунъий интеллект механизми ёрдамида юк ташиш компанияларининг ишлари 60% гача автоматлаштирилади. Ҳозирда АҚШда 250 дан ортиқ компания DATATRUCK хизматларидан фойдаланмоқда.

Учинчи инвестиция – $200 минг миқдорида BITO ERP томонидан жалб қилинди. Мазкур лойиҳа бизнес жараёнлар учун рақамли экотизим бўлиб, бугунги кунгача 1000 дан ортиқ компанияга ўз бизнес жараёнларини рақамлаштиришда ёрдам берган.

BITO ERP афзалликлари:

• Бир нечта бизнесни битта тизимда юритиш имконияти.
• Фойдаланувчилар ўзаро мижоз ёки таъминотчи сифатида интеграциялаша олади.
• QR-код орқали тўлов тизими билан савдони соддалаштиради.
• Мижозлар профили орқали ҳар бир харидор билан чуқур ишлаш имконини беради.
• Мултивалюталилик, кешбек тизими, видео қўлланмалар, онлайн ва офлайн режимда ишлаш, Telegram бот орқали фойдаланиш — буларнинг барчаси BITO'ни замонавий, фойдаланувчи учун қулай ва кучли тизимга айлантиради.

Мазкур стартап ёрдамида AloqaVentures Ўзбекистон ва минтақадаги корхоналарни глобал рақамли трансформация йўлига олиб чиқишни мақсад қилган.

Маълумот учун, Президентнинг 2025 йил 14 февралдаги ПҚ-62-сонли қарорида “Инновацион ёшлар” лойиҳаси бўйича венчур жамғармалари орқали ёшларнинг стартап лойиҳаларига капитал инвестициялар киритиш ва бошқа бир қатор йўналишларда қўллаб-қувватлаш кўзда тутилган бўлиб, AloqaVentures’нинг ушбу инвестициялари мазкур қарор ижросини бажаришга ҳам қаратилган.